قازاقستان رەسپۋبليكاسى پرەمەر-مينيسترىنىڭ ورىنباسارى بەردىبەك ساپاربايەۆ جامبىل وبلىسىنا جۇمىس ساپارى بارىسىندا قۇرىلىسى ءجۇرىپ جاتقان شاحريستان ەتنو-مادەني كەشەنىمەن تانىستى.

ۇكىمەت باسشىسىنىڭ ورىنباسارىنا كەشەندەگى جۇمىستار تۋرالى وبلىس اكىمىنىڭ ورىنباسارى ەركەبۇلان داۋىلبايەۆ باياندادى. بۇگىندە كەشەندەگى 8 نىسان بويىنشا قۇرىلىس جۇمىستارى قىزۋ ءجۇرىپ جاتىر. قازىرگى تاڭدا قۇرىلىس-مونتاج جۇمىستارىنىڭ 85-90 پايىزى، ارلەۋ-بەزەندىرۋ جۇمىستارىنىڭ 30-35 پايىزى اياقتالعان. بارلىعى 500-دەي قۇرىلىسشى، 30-دان اسا تەحنيكا جۇمىلدىرىلعان. ارلەۋ جۇمىستارى سامارقان ستيلىندەگى كىرپىشتەرىمەن جۇرگىزىلۋىنە بايلانىستى وزبەكستاننان ارنايى ماماندار تارتىلۋدا. ينفراقۇرىلىم مەن قامتۋ شارالارى تولىعىمەن ورىندالىپ بىتكەن. جالپى ءتورت گەكتار اۋماقتى قۇرايتىن ورتالىقتاعى قۇرىلىس جۇمىستارىنىڭ تولىعىمەن اياقتالۋى قاراشا ايىنىڭ اياعىنا جوسپارلانىپ وتىر.

سونداي-اق، ب.ساپاربايەۆقا كەشەن باسىندا ستەند ارقىلى «تەكتۇرماس» ەتنو-تاريحي كەشەنىنىندەگى جوسپارلى شارالار جايى دا تانىستىرىلدى. ۆيسە-پرەمەر جاسالىپ جاتقان جۇمىستاردى قۇپتاپ، ەكى مىڭ جىلدان استام تاريحى بار تاراز تاريحىن تانىتۋ جۇمىستارى تۇركىستاندى دامىتۋمەن قاتار جۇرگىزىلۋى كەرەكتىگىن اتاپ ءوتتى. سونداي-اق، كونە تارازدى حالىقارالىق تۋريستىك ورتالىققا اينالدىرۋدىڭ ماڭىزىن باسا ايتتى.