موڭعوليا ازاماتتىعىنان ءار جىلى ءتۇرلى سەبەپپەن شىعىپ قالعان ازاماتتار ەل پرەزيدەنتى ساحياگيين ەلبەگدورجىنىڭ 2013 جىلعى 10 مامىر كۇنگى  جارلىعى بويىنشا 408 ازامات موڭعوليا ازاماتتىعىنا قايتا قابىلداندى. 

بايان-ولگييدەگى كوپتەگەن جىلداردان بەرى قاراي كۇرمەۋى شەشىلمەي جالعاسىپ كەلگەن تۇيتكىلدى ماسەلە – ازاماتتىق ماسەلەسى ەدى. موڭعوليا مەملەكەتتىك ۇلى قۇرىلتاي مۇشەسى، مەملەكەتتىك قۇرىلىم تۇراقتى كوميتەتىنىڭ ءتوراعاسى باكەي اعىپار ۇلى جانە ايماق باسشىلىعىنىڭ موڭعول پرەزيدەنتى مەن ۇكىمەت ورنىنا ماسەلەنى ءجيى-جيى جەتكىزىپ، جاعدايدى ەگجەي-تەگجەيلى تانىستىرۋىنىڭ ناتيجەسىندە موڭعوليا ازاماتتىعىنا قايتا قابىلداۋ تۋرالى موڭعوليا پرەزيدەنتى ساحياگيين ەلبەگدورجنىڭ جارلىعى شىعىپ، العاشقى كەزەكتە 408 ادامنىڭ ازاماتتىق ماسەلەسى شەشىلدى. وسىلايشا، بايان-ولگيي ايماعى ازاماتتارىنىڭ باسىنداعى قوردالانعان، ەڭ وزەكتى ماسەلە شەشىمىن تابا باستادى. ال، ءوتىنىش بىلدىرگەن وزگە ازاماتتاردىڭ قايتادان موڭعوليا ازاماتتىعىنا ءوتۋى ماسەلەسى جان-جاقتى قاراستىرىلىپ جاتىر جانە جۋىق ارادا شەشىمىن تاباتىن بولادى، - دەپ حابارلايدى ءااىبورىنى باسپا ءسوز قىزمەتكەرى نۇربولات ونەرحان ۇلى. ايتا كەتەيىك، موڭعوليا ازاماتتىعىن قايتادان الىپ جاتقانداردىڭ بارلىعى ءبىزدىڭ سوندا تۇراتىن قازاق اعايىندار. وسىدان بۇرىن 800 قازاق موڭعوليانىڭ ازاماتتىعىن قايتادان سۇراعان بولاتىن. ولاردىڭ كوبى قازاقستانعا كوشكەن دەگەن جالعان قۇجاتتارعا بايلانىستى موڭعول ەلىنىڭ ازاماتتىعىنان شىعىپ قالعان، ەكى ەلدە دە ازاماتتىعى جوق قانداستارىمىز. ءتىپتى، بۇلاردىڭ ىشىندە اتاجۇرتقا كوشۋ ءۇشىن 13 جىل بۇرىن موڭعول ازاماتتىعىنان شىعىپ، قازاقستانعا ورالا الماي وتىرعاندارى دا جەتەرلىك. سوڭعى مالىمەتتەرگە سۇيەنسەك، بۇگىن 695 قانداسىمىزدىڭ ازاماتتىعى قايتادان قالپىنا كەلتىرىلگەن. ەندى الداعى ۋاقىتتا 230-عا جۋىق ازاماتتىڭ ماسەلەسى دە قارالماق. موڭعوليا قازاق جۋرناليستەرى ازاماتتىققا قايتا قابىلدانعان اعايىندار موڭعول ۇكىمەتى تاراپىنان كورسەتىلەتىن جەڭىلدىكتەرگە قول جەتكىزەتىنىن جەتكىزدى. دەرەككوز