سوڭعى جىلدارى ەلىمىزدىڭ ونەرى مەن مادەنيەتىندە تىڭ وزگەرىستەر مەن ىزدەنىستەر،زامان اعىنىمىنا قاراي جاڭا بەتبۇرىستار بايقالادى.ۇلتتىق مۋزىكامىزدى زامان ىرعاعىنا قاراي بەيىمدەپ، تىڭدارمانعا ۇسىنۋ ءۇردىسى دە ءجۇرىپ جاتىر. ەندىگى رەتتە ەلىمىزدەگى مۋزىكا سالاسىندا جۇرگەن تالانتتاردى ءبىر ورتاعا توعىستىراتىن كولەمدى مۋزىكا بايقاۋى كەرەك-تىن. سول سۇرانىسقا ساي، شىن تالانتتاردى تاڭداپ، سىيلىق ۇسىنىپ ماراپاتتاۋ ماقساتىندا بيىل تۇڭعىش رەت وتكەلى وتىرعان «استانا جۇلدىزى» ۇلتتىق مۋزىكا بايگەسى وتكەلى وتىر.
الەمدە مۋزىكا سالاسىنداعى ۇزدىكتەردى ماراپاتتايتىن "گرەممي"، «World Music Awards»،بريت ەۋوردس سەكىلدى بەلگىلى كاسىبي بايقاۋلار مەن سىيلىقتار بار. سونداي بايقاۋلاردىڭ وتاندىق ءتۇرى - «استانا جۇلدىزى» اتتى ۇلتتىق مۋزىكا بايگەسى ەندى ءبىزدىڭ ەلىمىزدە دە ءداستۇرلى تۇردە وتكىزىلەتىن بولادى. مامانداردىڭ پىكىرىنشە، «استانا جۇلدىزى» بايقاۋى وتاندىق مۋزىكا وندىرىسىندەگى تىڭ قۇبىلىس بولماق. ونىڭ سوڭعى جىلدارى تاعايىندالعان وزگە مۋزىكالىق سىيلىقتاردان باستى ەرەكشەلىگى – ءبىرىنشى كاسىبي مۋزىكالىق بايگە بولۋىندا. جوبانىڭ باستى ماقساتى – كاسىبي بىلىكتى ساراپشىلاردىڭ تاڭداۋى ارقىلى ۇلتتىق مۋزىكانىڭ وركەندەپ، ورلەۋىنە ىقپال ەتۋ، ساپالى مۋزىكانىڭ سۇرانىسقا كەڭىنەن يە بولۋىنا جاعداي جاساۋ.
بايقاۋ بارىسىندا وتاندىق مۋزىكا ونەرىنىڭ دامۋىنا، جاڭارىپ، جاڭعىرۋىنا اسەر ەتكەن ۇزدىك ونەرپازدار، شىن دارىندىلار عانا ىرىكتەلىپ الىنادى. ءادىلقازىلار القاسى دا ۇزدىكتەردەن قۇرالعان. قۇرامىندا ەلىمىزگە بەلگىلى جۇزدەن استام كاسىبي مامان، اتاپ ايتقاندا، ق ر ەڭبەك سىڭگەن ارتىستەر، پروديۋسەرلەر، كومپوزيتورلار، اقىندار، مۋزىكا جانە fashionء-وندىرىس ماماندارى، ب ا ق وكىلدەرى بار قازاقستاننىڭ مۋزىكالىق اكادەمياسى تاڭدايدى.
بۇل بايقاۋعا سوڭعى ءبىر جىل كولەمىندە تاباندى ەڭبەك ەتكەن ونەرپازدار، انشىلەر، شىعارماشىلىق بىرلەستىكتەر قاتىساتىن بولادى. ساراپشىلاردىڭ داۋىس بەرۋى ءۇشىن ارنايى داۋىس بەرۋ پاراقشاسى دايىندالعان. قازاقستاننىڭ مۋزىكالىق اكادەمياسى مۇشەلەرىنىڭ داۋىس بەرۋى ەكى كەزەڭنەن تۇرادى. ءبىرىنشى كەزەڭدە 15 اتالىم بويىنشا قاتىساتىن 350 ۇمىتكەر اراسىنان لايىقتى دەپ تانىلعان 45 قاتىسۋشى ىرىكتەلەدى. ەكىنشى كەزەڭدە ۇزدىك 15 جەڭىمپاز انىقتالادى.
«استانا جۇلدىزى» ۇلتتىق مۋزىكا بايگەسىندە ۇمىتكەر ونەرپازدار 15 اتالىم بويىنشا ءوز ونەرلەرىن ورتاعا سالادى. ماسەلەن، "جىل ءانى"، "ۇزدىك ەتنو توپ"، "ۇزدىك دۋەت"، "قىزدار اراسىندا ۇزدىك ەسترادا ورىنداۋشىسى"، "جىگىتتەر اراسىندا ۇزدىك ەسترادا ورىنداۋشىسى" سەكىلدى بولىمدەر بويىنشا وتەدى. اتالىم سانىنىڭ 15 بولۋى استانا قالاسىنىڭ 15 جىلدىعى قۇرمەتىنە ورايلاستىرىلىپ وتىر.
وتاندىق مۋزىكا ءوندىرىسىنىڭمايتالماندارىن ءبىر ورتاعا جينايتىن «استانا جۇلدىزى» بايقاۋى 2013 جىلدىڭ 5 شىلدەسىندە «قازاقستان» ورتالىق كونسەرت زالىندا وتەدى. ماراپاتتاۋ راسىمىندە قازاقستاننىڭ مۋزىكا تاريحىندا قايتالانباس ءىز قالدىرعان ورىنداۋشىلار، سونىمەن قاتار ارنايى شاقىرتىلعان شەتەلدىك قوناق، الەمدىك ساحنالاردى باعىندىرىپ جۇرگەن دجامالا ونەر كورسەتەدى.
ەندەشە، تالاپتىلاردان تالانتتىلاردى تاڭداپ الاتىن بايقاۋدىڭ عۇمىرى ۇزاق، "سىنى شىن"، ونەرلىلەردىڭ ورگە باسۋىنا سەپتىگى تيەدى دەپ سەنەمىز!
P.S.: بىلتىر شىعارماشىل جاستاردى شابىتتاندىراتىن حالىقارالىق "شابىت" باۋقاۋىنان شي شىعىپ، كوپشىلىكتى ءبىر شۋلاتقانىن بىلايعى جۇرت ءالى ۇمىتا قويعا جوق. ەلىمىزدىڭ ەڭ مارتەبەلى سىيلىعى سانالاتىن مەملەكەتتىك سىيلىقتىڭ توڭىرەگىندەگى داۋ دا دۋىلداپ بارىپ باسىلدى. بايگەلەردىڭ سوڭىن مۇنداي بىتپەس داۋ-دامايعا اپاراتىن نارسە - ءادىلقازىلاردىڭ جەرشىلدىك پەن رۋشىلدىققا قاراي بۇرا تارتاتىنى، قاتىسۋشىلاردىڭ ونەرىنەن گورى اتاق-ابىرويىنا بۇرىپ تۇراتىن جاعىمپازدىق، "كوكە" مەن "قالتانىڭ" اسەرىنەن بولعانى جاسىرىن ەمەس. ال بيىل تۇڭعىش رەت تۇساۋى كەسىلگەلى وتىرعان جاڭا بايقاۋ "استانا جۇلدىزى" الدىڭداعى "اعا" بايقاۋلاردان ۇلگى الماي، شىن تالانتتاردى تاڭداي بىلسە ەكەن... ارينە، تالانت تارازىمەن ولشەنبەسە كەرەك. الايدا، ونەردىڭ ءوسۋى ءۇشىن ىنتالاندىرۋ، ارنايى اتاق-ابىروي دا ارتىقتىق ەتپەيتىنىن ۇمىتپاساق يگى...
پىكىر قالدىرۋ