الماتى وبلىسىنىڭ اكىمى اماندىق باتالوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا ورىنباسارى باعدات ءمانىزوروۆتىڭ ىسىنە قاتىستى پىكىر ءبىلدىردى. ا.باتالوۆ مالىمدەمەسىنىڭ ۆيدەوسى yyedilov telegram-ارناسىندا پايدا بولدى.
"وقيعا ورىن العاندا ول (باعدات ءمانىزوروۆ) ماعان كەلىپ، بۇرىنعى جۇمىسىنا، الماتىعا قاتىستى ەكەنىن ايتتى. مەن ءمان-جايىندى ءبىل، ماسەلەنى شەش دەدىم. جاعداي كۇشەي باستاعاندا مەنەن تولەمسىز ەڭبەك دەمالىسىن سۇرادى. مەن جىبەردىم. نە بولعان، بولماعانىن انىقتاۋ تەرگەۋ ىسىنە قاتىستى ماسەلە. ال ادام رەتىندە مەن ونى كوپتەن بىلەمىن" دەگەن اكىم ورىنباسارىنىڭ قىزمەتىن جاقسى اتقارعانىن ايتا كەلىپ، "جاعدايعا ادامي تۇرعىدا قاراۋ كەرەكتىگىن، بۇنداي جاعدايعا كەز كەلگەن ادام ۇشىراۋى مۇمكىن ەكەنىن ايتتى.
ەسكەرتە كەتەلىك، قىركۇيەك ايىنىڭ سوڭىندا الماتى وبلىسى اكىمىنىڭ ورىنباسارى باعدات ءمانىزوروۆتىڭ ۇستالعانى، قىزمەتتىك جاعدايىن پايدالانىپ، اسا ءىرى كولەمدە الاياقتىق جاسادى دەگەن كۇدىككە ىلىنگەنى حابارلاندى. ارتىنشا بۇلتارتپاۋ شاراسى ءۇي قاماققا اۋىستىرىلدى، 18 قازاندا قاماۋدا ەمەس، دەمالىستا دەلىندى. 29 قازاندا قازاقستان رەسپۋبليكاسىنىڭ باس پروكۋراتۋراسى ءمانىزوروۆقا قاتىستى ءىستى توقتاتىپ، اكىم ورىنباسارى 30 قازاندا قىزمەتىنە ورالدى.
وقي وتىرىڭىز
♦ "ءمانىزوروۆ ءىسى" قازاقستاننىڭ اقپارات قاۋىپسىزدىگى قاي دەڭگەيدە ەكەنىن كورسەتتى
