سەنات دەپۋتاتى مۇرات باقتيار ۇلى سوڭعى كەزدەرى باسى داۋدان ارىلا الماي جۇرگەن ءبىلىم جانە عىلىم مينيسترلىگىنە شۇيلىكتى – دەپ Qamshy.kz اقپارات اگەنتتىگى حابارلايدى، sputnik -كە سىلتەمە جاساپ.
"ءبىلىم جانە عىلىم مينيسترلىگى – ىقىلىم زاماننان بەرى كيەلى ورتا، قاسيەتتى ورتا. الايدا، وكىنىشكە قاراي، سوڭعى كەزدە مينيسترلىك ءبىلىم جانە عىلىم سالالارىنىڭ الدىندا تۇرعان ۇلكەن مىندەتتەردى شەشۋدىڭ ورنىنا ءوزارا قاقتىعىستاردىڭ وبەكتىسىنە اينالعان سياقتى"، – دەدى سەناتور ۆيسە-پرەمەر بەردىبەك ساپاربايەۆقا جولداعان دەپۋتاتتىق ساۋالىندا.
سەناتوردىڭ ساۋالىنا ءبىر اي بۇرىن ءبىلىم جانە عىلىم مينيسترلىگى اكىمشىلىك جۇمىس جانە مەملەكەتتىك ساتىپ الۋ دەپارتامەنتىنىڭ ديرەكتورى انار قايىربەكوۆانىڭ وڭتۇستىك قازاقستان مەملەكەتتىك پەداگوگيكا ۋنيۆەرسيتەتىنىڭ رەكتورى بولىپ تاعايىندالۋى سەبەپ بولدى.
دەپۋتاتتىڭ مالىمدەۋىنشە، قايىربەكوۆا دەپارتامەنتتى باسقارعان جىلدارى وعان قاتىستى 16 ءىس قارالعان.
"بارلىق شاعىم مەن زاڭدى بۇزۋ پروسەستەرى قازىرگى ۋاقىتتا اياقتالدى ما؟ نەمەسە شاعىمدار قازىرگى كۇنگە دەيىن سوتتا قارالىپ جاتىر ما، الدە بۇل ادام تولىق اقتالدى ما؟ جوعارىدا باياندالعان زاڭ بۇزۋشىلىقتار مەن كەمشىلىكتەرگە قاراماستان، مۇنداي تۇلعانى ۋنيۆەرسيتەتتىڭ باسشىلىق لاۋازىمىنا تاعايىنداۋ قانشالىقتى زاڭدى جانە قانشالىقتى ادەپ نورمالارىنا سايكەس كەلەدى؟"، – دەيدى باقتيار ۇلى.