كوكشەتاۋدا ءۇش ايلىق نارەستە كوز جۇمدى. بۇل تۋرالى وبلىستىق دەنساۋلىق ساقتاۋ باسقارماسىنا سىلتەمە جاساپ، Qamshy.kz اقپارات اگەنتتىگى حابارلايدى.

كراسنىي يار اۋىلىنداعى باستاپقى مەديسينالىق-سانيتارلىق كومەك ورتالىعىنىڭ باس دارىگەرىنىڭ مالىمدەۋىنشە، دارىگەر مەن مەدبيكە جانياۇعا پاتروناجدى ۇدايى جاساپ وتىرعان.

"1 جانە 2-ايدا بالانىڭ دەنساۋلىعىنا قاتىستى اناسىنان شاعىم بولماعان. مەدبيكە 6 قاراشادا ونىڭ ۇيىنە بارعاندا دا ەشتەڭە ايتپاعان. مەدبيكە بالانى تەكسەرىپ، كۇتىمى بويىنشا ءتيىستى ۇسىنىستارىن ءتۇسىندىرىپ كەتكەن. ال 12 قاراشا كۇنى ءۇش ايلىق مەرزىمىندە دارىگەر قابىلداۋىنا كەلۋى ءتيىس بولعان. ءبىراق ول كەلمەگەن. سوندىقتان مەدبيكە سول كۇنى كەشكىسىن ولاردىڭ ۇيىنە بارعان. ءۇي يەلەرى دالادان قارسى الىپ، قوناققا بارۋعا ازىرلەنىپ جاتقاندارىن ايتقان»، – دەپ ۆەدومستۆو وكىلدەرى ءمالىم ەتتى. 15 قاراشادا بالا شۇعىل تۇردە وبلىستىق كوپبەيىندى بالالار اۋرۋحاناسىنا جاتقىزىلدى. «باستاپقى دياگنوزى: اسپيراسيالىق سيندروم. ويتكەنى بالا اۋرۋحاناعا اۋىر حالدە جەتكىزىلگەن. جانساقتاۋ بولىمىندە شۇعىل ەم-دوم شارالارى جۇرگىزىلگەنىنە قاراماستان، شاقالاقتىڭ ءومىرىن ساقتاپ قالۋ مۇمكىن بولعان جوق"، –دەيدى دارىگەرلەر.

قازىرگى تاڭدا اقمولا وبلىسىنىڭ اكىمى ەرمەك مارجىقپايەۆ نارەستەنىڭ ءولىمىن تەكسەرۋدى ءوز باقىلاۋىنا الدى.

"وبلىس ورتالىعىندا ءۇش ايلىق بالانىڭ كوز جۇمعان فاكتىسى بويىنشا جاعدايدى باقىلاۋىما الدىم. مەنىڭ ورىنباسارىم، اينا ءمىسىرالىموۆا ءتورايىم بولىپ بەكىتىلگەن كوميسسيا ماسەلەنىڭ ەگجەي-تەگجەيىن زەرتتەۋدە، قورىتىندىسى باق-تا جاريالاناتىن بولادى. بالانىڭ اتا-اناسىنا جانە تۋىستارىنا ءوز كوڭىلىمدى بىلدىرەمىن"، – دەپ مارجىقپايەۆ ءوزىنىڭ instagram پاراقشاسىنا جازدى.  

وبلىستىق دەنساۋلىق ساقتاۋ باسقارماسىنىڭ مالىمەتىنە سۇيەنسەك، نارەستەنىڭ نەدەن شەتىنەگەنىن سوت-مەديسينالىق ساراپتاما انىقتايتىن بولادى.