بۇگىن، 25 قاراشا كورنەكتى الاش قايراتكەرى، «الاش» اۆتونومياسى مەن الاشوردا ۇكىمەتىن قۇرۋدا كوپ ەڭبەك سىڭىرگەن ءبىرتۋار تۇلعا، اقىن، جازۋشى ءمىرجاقىپ دۇلات ۇلى تۋعان كۇن. "ويان، قازاق!" دەپ  ۇرانداتىپ، حالقىنىڭ ازاتتىعىن اڭساعان اقىننىڭ تۋعان كۇنىنە وراي قاناتتى سوزدەرگە اينالعان ولەڭ جولدارىن ۇسىنامىز.

– اركىم ءوز قولىنان كەلگەنشە جومارت؛

– ەل شاۋىپ كىسى ولتىرگەن بوپ پا باتىر؛

– بىلگەنگە – قيىن ەمەس كەتۋ بايىپ؛

– ارتىقتان تاعىلىم ال، كەمگە – ۇيرەت؛

– «مولدانىڭ وكشەسى قيسىق دەگەن كىسى دە كۇنالى بولادى» دەپ جۇرگەن ادامدار دا بار؛

– بىلگەنگە – يشارا، بىلمەسكە – قور؛

– قازاقتا جازىلمايتىن ءبىر اۋرۋ بار – كەلمەيدى ءمىنىن ايتساڭ جاراتقىسى؛

– اعايىن – ارزان، پۇل – قىمبات؛

– ايتۋ – بىزدەن، ىستەۋ – سىزدەن؛

– ءوزىڭ بىلگەنىڭدى حالقىڭا ۇيرەت؛

– دۇنيەدە كەدەيلىك جوق ونەرپازعا؛

– عىلىم ۇيرەن – كوزىڭ اشىلادى؛

– حالىق پايداسىن اقىلمەن ىستەر بولار؛

– بولعاندا بويدا قۋات جۇرگەن جاقسى؛

– اياعىڭ ءبىر كۇن قىلدان كەتەر تايىپ؛

– وتىرما ءبىر ورىندا قۇر مۇڭايىپ؛

– ار-نامىس، ماحاببات بولماعان جەردە ادامشىلىق تۇرا ما؟؛

– سوت تۇزەلمەي – حالىق تۇزەلمەيدى؛

– اللا جاقىن كەۋدەدە وتى بارعا؛

– ارشىن جۇتقان كىسىدەي كەكىرەيمە؛

– قۇس – تورعا، بالىق – اۋعا، باتىر – جاۋعا؛

– زاڭ ادەت-عۇرىپقا قايشى كەلسە – ۇلكەن اياققا تار ەتىك كيگەنمەن بىردەي؛

– نە جامان؟ – قىزدىرمانىڭ قىزىل ءتىلى جامان؛

– مايدا بول جىگىت بولساڭ تال جىبەكتەي؛

جاقسى ەمەس قاتتى بولۋ تىكەنەكتەي.

عىلىمىڭ بولسا داعى ۇشان-تەڭىز،

پايدا جوق ءوز حالقىڭا قىزمەت ەتپەي؛

– حالىق تاعدىرى – كارتا ويىنى ەمەس؛

– اكەدە دە اكە بار، بالادا دا – بالا بار؛

– دوس ەمەس دوس سىرتىنان جامانداعان؛

– قۇل دەسەڭ ءبيدى – كۇلەدى، قۇل دەسەڭ قۇلدى – ولەدى؛

– الىس پەن جاقىن ويلى بولماس جولداس؛

قاس قىلعان جولداسىنا جىگىت وڭباس؛

– بوي تەجەۋ، جۇرەكسىنۋ دۇرىس ەمەس،

شاشىلعان ريزىقتى تەرىپ تاتپاي.

جىگىتتىڭ نەسى جىگىت بوسقا جۇرگەن،

قىزمەتپەن پايدا بەرىپ، حالىققا جاقپاي؟!؛

– قىزىعى بۇل جالعاننىڭ – مال مەنەن باس؛