بەلگىلى ونەرتانۋشى، ءداستۇرلى ءانشى ەرلان تولەۋتاي ساياسات پەن بيلىك، جاڭا پارتيالاردىڭ قۇرىلۋى تۋرالى "Qajet" يۋتۋب كانالىنا بەرگەن سۇحباتىندا تىلگە تيەك ەتتى، – دەپ جازادى  Qamshy.kz اقپارات اگەنتتىگى.

سۇحبات بارىسىندا ونەرتانۋشى "ەشقانداي پارتياعا مۇشە ەمەسپىن!" دەپ بۇگىنگى ساياسي احۋال، مادەنيەت، ۇلتتىق ونەر جايلى كوپتىڭ كوكەيىندە جۇرگەن ماسەلەنى كوتەردى.

"جاستاۋ كەزىمدە پارتيا قۇرام دەۋشى ءبىراز ازاماتتارمەن ارالاستىم. بۇلاردىڭ بارلىعى ويىن ەكەن. مەن وتكەندە "ەگەر ۇلتتىق بۋرجۋازيا بولسا" دەگەن تاقىرىپتا ماقالا جازىپ، ءوز ويىمدى ايتتىم. بىزدە ۇلتتىق بۋرجۋازيا بولماي، پارتيا قۇرام دەۋ –  دالباسا تىرلىك! ويتكەنى، پارتيا قۇرام دەپ جۇرگەن جىگىتتەردىڭ ەشقايسىسىنىڭ قالتاسىندا كوك تيىن اقشاسى جوق. ال پارتيا دەگەن سەنىڭ ەسەبىڭدە اقشا بولماسا، العا جىلجىمايدى.

اسانقايعى، بۇقار جىراۋلاردىڭ  "قانشا شەشەن بولسا دا، داۋعا سالما مالسىزدى" دەگەن ءسوزى بار عوي. مىنالار – مالسىزدار. بۇلاردىڭ مالى جوق، قالاي پارتيا قۇرادى؟  پارتيا قۇراتىن، ەل بيلەيتىن ادامنىڭ ماڭدايى جارقىراپ تۇرادى. ءبىر پارتيانى الىپ شىعاتىن ادامنىڭ تۇلعاسىنان بەلگىلى بولىپ تۇرادى. ءبىز ونداي كەرەمەت تۇلعا كورگەن جوقپىز. كەزىندە ەلدىڭ ءبارى قوسانوۆتى ءبىزدىڭ كوسەمىمىز، ەلدى العا الىپ شىعادى دەپ ويلادى. بۇقارانىڭ بالالىق اۋرۋى ءالى تارقاعان جوق. ءبىزدىڭ ساياسي پروسەستەر ءالى بالاڭ كۇيدە ءجۇر. كىم شىقسا بولدى، سول – كوسەم. بىرەۋ جاقسى ءسوز ايتىپ جىبەرسىنشى، حالىق سونىڭ سوڭىنان ەرەدى.

"ءاي، حالقىم، مەن بيلىككە قارسىمىن!" دەسە بولدى، سونىڭ سوڭىنان جۇگىرەدى. ماسەلە ولاي شەشىلمەيدى عوي. ساياساتتا پاراسات پەن پاراساتتى تۇلعا بولۋى كەرەك. قوسانوۆتىڭ ساياسي كۇرەسكەر بولىپ جارىتپايتىنى كوزىندە تۇردى. سول كەزدە مىنا كىسى اياعىنا دەيىن بارمايدى، ەرتەڭ كورەسىڭدەر دەپ ايتقانىمدا، ءبارى مەنى حالىق جاۋى سانادى. ۇلتتىڭ قايراتكەرىن تانيتىن ۇلتتىق ينستينكتەر ءولىپ قالعان. حالىقتىق-ۇلتتىق ساياساتكەرلەر جوق. ۇلتتىق بۋرجۋازيا بولماي، ۇلتتىق پارتيا قۇرىلمايدى. سوندىقتان وسىنداي شورە-شورە پارتيالار جۇرە بەرەدى. بيلىككە راحات، ولارمەن كۇرەسۋ وڭاي، جەڭىسكە جەتە سالادى"، –  دەپ ازاماتتىق پىكىرىن اشىق ءبىلدىردى.

ودان وزگە ەرلان تولەۋتاي  بيلىك پەن ساياساتقا 30-40 جاستاعى ازاماتتاردىڭ كەلگەنى دۇرىس دەگەن ويىن ءبىلدىردى.

"ءقازىر مادەنيەتكە كومەكتەسىپ جاتقان بايشىكەشتى تاباسىز با، جوق. ولاردىڭ ءوز ۇلتىنا جانى اشىمايدى. جانى اشىماعان ولار، ۇلتتىق پارتياعا اقشا سالىپ قايتەدى!؟ قوعام تاۋەلسىزدىكتىڭ بالالىق اۋرىنان ءالى ايىقپاعان. ەندى جاڭا تولقىن كەلۋى كەرەك. 50-60-70-كە كەلگەندەر جىلى جاۋىپ قويۋ كەرەك. ەندىگى ءۇمىت 30-40 جاستاعىلاردا. ولار دۇنيەنى وزگەرتەدى. بىزدەن تۇك شىقپايدى. ءبىزدىڭ بۋىن، بىزدەن ۇلكەن بۋىن 30 جىلدا ابدەن توزدى، سارقىلدى. تۇك ىستەي المادىق"، – دەپ ءسوزىن تۇيىندەدى..