بيىلعى تىركەۋ ناۋقانى كەزىندە 9 مىڭ الماتىلىق تۇرعىن ەمحانا تاڭداۋ قۇقىعىن پايدالاندى. بۇل تۋرالى بۇگىن ارنايى بريفينگ بارىسىندا «الەۋمەتتىك مەديسينالىق ساقتاندىرۋ قورى» كەاق الماتى قالالىق فيليالىنىڭ ديرەكتورى تىلەۋحان ابىلدايەۆ حابارلادى.

تىلەۋحان ابىلدايەۆتىڭ سوزىنە سۇيەنسەك، تىركەۋ ناۋقانىنا قاتىسقان ازاماتتار سانى بىلتىرعى جىلمەن سالىستىرعاندا ەداۋىر قىسقارعان. بۇعان اتالعان كامپانيانىڭ ەلەكتروندى سيفرلىق قولتاڭبانىڭ كومەگىمەن، Egov ەلەكتروندى ۇكىمەت پورتالى ارقىلى جۇرگىزىلۋى سەبەپ. ونىڭ ۇستىنە، سوڭعى كەزدە تۇرعىلىقتى جەرىندەگى ەمدەۋ مەكەمەسىنىڭ قىزمەتىن پايدالاناتىن تۇرعىندار سانى جىل ساناپ ارتىپ كەلەدى.

– سوڭعى جىلدارى حالىق اراسىندا، مەديسينا ۇيىمدارى اراسىندا ءاقپاراتتىق-تۇسىندىرۋ جۇمىستارى كوپ جۇرگىزىلدى. بۇعان ەمحانا اۋىستىرۋشىلار سانىنىڭ كۇرت تومەندەۋى دالەل بولسا كەرەك. مىسالى، جاقىن ماڭداعى ەمحانا ارقىلى ۇيگە دارىگەر شاقىرتۋعا ىڭعايلى. وعان قوسا، ءقازىر جەدەل بولماسا، 4 ساناتتاعى شاقىرتۋلاردىڭ بارىنە جەرگىلىكتى ەمحانا بريگادالارى قىزمەت كورسەتەدى، –  دەدى فيليال ديرەكتورى.       

بيىلعى تىركەۋ ناۋقانىنا الماتى قالاسىنان 77 مەديسينا ۇيىمى قاتىستى. ونىڭ 38ء-ى جەكەمەنشىك كلينيكالار. بۇل جەكە بيزنەستىڭ مەملەكەتتىك تاپسىرىستى ورىنداۋعا دەگەن قۇلشىنىسىنىڭ ارتىپ وتىرعانىن بىلدىرەدى.

ەستەرىڭىزگە سالا كەتسەك، تىركەۋ ناۋقانى قىركۇيەكتىڭ 15-ىندە باستالىپ، 15 قاراشادا اياقتالعان بولاتىن. ءبىراق تاڭداۋ جاساپ ۇلگەرمەگەن ازاماتتار ەمحانانى باسقا ۋاقىتتا دا اۋىستىرا الادى. اتاپ ايتقاندا، باسقا جەرگە قونىس اۋدارعاندا، ەمحانا قايتا ۇيىمداستىرىلعاندا نەمەسە مەديسينالىق ساقتاندىرۋ قورىمەن كەلىسىمشارتتى بۇزعان جاعدايدا دا باسقا ەمحاناعا تىركەلۋگە بولادى. سونىمەن قاتار، ءار تۇرعىننىڭ ەمحانانى جىلىنا ءبىر رەت ەركىن تاڭداۋ قۇقىعى بار.