2020 جىلدان باستاپ «بولاشاق» ستيپەندياسىنا ارنالعان كۆوتانىڭ بارلىق ءتۇرى الىنىپ تاستالادى. بۇل تۋرالى ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا ق ر ءبىلىم جانە عىلىم ۆيسە-مينيسترى رۇستەم بيعاري ايتتى، دەپ حابارلايدى قازاقپارات.
ونىڭ ايتۋىنشا، ق ر مەملەكەتتىك حاتشىسى، شەتەلدە كادر دايىنداۋ جونىندەگى رەسپۋبليكالىق كوميسسيانىڭ ءتوراعاسى قىرىمبەك كوشەربايەۆتىڭ تاپسىرماسىنا سايكەس، «بولاشاق» باعدارلاماسىنىڭ جاڭا ەرەجەسىنىڭ جوباسى ەنگىزىلگەن.
وعان سايكەس، كەلەسى جىلدان باستاپ ۇمىتكەرلەرگە جاڭا تالاپ قويىلادى. اتاپ ايتقاندا، باسىمدىققا يە ماماندىقتارعا باسا نازار اۋدارىلادى. ستيپەندياعا ۇمىتكەرلەر اعىلشىن تىلىنە جەتىك بولعاندىقتان كەلەسى جىلدان باستاپ شەتەلگە جىبەرمەس بۇرىن تىلدىك دايىندىقتان ءوتۋ تالابى الىنىپ تاستالادى.
– تاعى ءبىر جاڭالىق – ءبىز كۆوتانىڭ بارلىق تۇرىنەن باس تارتامىز. ءقازىر مەملەكەتتىك قىزمەتشىلەر ءۇشىن، ينجەنەرلىك-تەحنيكالىق ماماندىقتار ءۇشىن كۆوتا بار. وسى كۆوتالار جويىلادى. ءبىر عانا جالپى كونكۋرس جانە ماقساتتى دايىندىق بولادى، – دەدى رۇستەم بيعاري.
پىكىر قالدىرۋ