بۇگىن ق ر ۇلتتىق بانكى «الەمنىڭ ايگىلى مەشىتتەرى» مونەتالار سەرياسىنان نومينالدىق قۇنى 500 تەڭگەلىك  «Baiturrahman» ەسكەرتكىش التىن مونەتاسىن اينالىسقا شىعاردى. ونىڭ بەت جاعىنىڭ ورتاسىندا يسلامنىڭ قاسيەتتى ورىندارىنا كىرەبەرىستى بىلدىرەتىن ستيلدەندىرىلگەن اركانىڭ بەينەسىنەن، گەرالديكالىق شيىرشىقتان جانە مونەتانىڭ نومينالىن بىلدىرەتىن جازۋدان تۇراتىن كومپوزيسيا بەينەلەنگەن. نومينال سيفرلارىنىڭ وڭ جاعىندا مونەتا دايىندالعان مەتالدىڭ سىناماسىن بىلدىرەتىن «Au 999» دەگەن جازۋ ورنالاسقان. اينالدىرا مەملەكەتتىك تىلدە «قازاقستان ۇلتتىق بانكى» دەگەن جازۋ مەن بانك  لوگوتيپى جانە مونەتانىڭ سوعىلعان جىلىن بىلدىرەتىن «2013» دەگەن سان، قازاقستان تەڭگە سارايىنىڭ تاۋار بەلگىسى جانە شىعىڭقى جيەك بار. سىرت جاعىنىڭ  ورتاسىندا بايتۋرراحمان  مەشىتىنىڭ بەينەسى،  جوعارى بولىگىندە اعىلشىن تىلىندە «BAITURRAHMAN» دەگەن جازۋ جانە اينالدىرا شىعىڭقى جيەك بار. مونەتالاردىڭ بەت جانە سىرت جاعىنداعى بەينەلەر، جازۋلار جانە قىرى بەدەرلى. ول  999 سىنامدى التىننان جاسالعان، سالماعى 3،11 گرامم، ديامەترى - 16 مم، دايىنداۋ ساپاسى - «proof»، تارالىمى -  3 مىڭ دانا. Baiturrahman مەشىتى يندونەزيانىڭ باندا-اچەح قالاسىنىڭ ورتالىعىندا اچەح پروۆينسياسىندا ورنالاسقان. پروۆينسيانىڭ تۇرعىندارى ءۇشىن مەشىتتىڭ ءدىن مەن مادەنيەت نىشانى رەتىندە سيمۆوليكالىق ءمانى زور، ونىڭ ۇستىنە ول 2004 جىلعى جويقىن سۋناميدەن امان قالدى.