ورتالىق كوممۋنيكاسيالار قىزمەتىندەگى بريفينگتە الماتى اكىمى باقىتجان ساعىنتايەۆ شاھارداعى جاڭا جولدىڭ قۇرىلىسى جونىندە ايتتى.

الماتى اكىمدىگىنىڭ الدىندا تۇرعان قىسقا مەرزىمدى مىندەت – جاقسى جانە قاناعاتتانارلىق جاعدايداعى جولداردىڭ ۇلەسىن 75%-عا دەيىن جەتكىزۋ. بۇگىنگى كۇنى 231 كوشەدەگى 54 شاقىرىم جولدىڭ قۇرىلىسى اياقتالدى.

– ۇزىندىعى 135 شاقىرىم بولاتىن 147 كوشەدەگى جولدارعا ورتاشا جوندەۋ جۇمىستارى جۇرگىزىلدى. 2020 جىلى الماتىنىڭ شەتىندە تاعى 120 شاقىرىم جولدىڭ قۇرىلىسى باستالادى، – دەپ ناقتىلادى ب. ساعىنتايەۆ.

الماتىلىقتار ءۇشىن ەڭ وزەكتى ماسەلەنىڭ ءبىرى – قوعامدىق كولىكتىڭ جۇمىسى. جولاۋشىلار تاسىمالىنىڭ ساپاسىن ارتتىرۋ – الماتىلىقتاردىڭ ءومىر ءسۇرۋ دەڭگەيىن جاقسارتۋداعى باستى مىندەتتەردىڭ ءبىرى.

– وسىعان وراي ءبىز قوعامدىق كولىك سانىن ارتتىرامىز. كوممەرسيالىق قۇرىلىمدار 172 اۆتوبۋس ساتىپ الدى. قالا بيۋدجەتى ەسەبىنەن گازبەن جۇرەتىن تاعى 260 اۆتوبۋس الىندى، – دەدى قالا اكىمى ب. ساعىنتايەۆ جانە جاڭارعان اۆتوبۋس پاركتەرىنىڭ 90%-عا جەتكەنىن ناقتىلادى.

قالادا بارلىق تروللەيبۋس جەلىسىن مودەرنيزاسيالاۋ باستالدى. اكىمدىك قوعامدىق كولىكتىڭ ەكولوگيالىق تازا تۇرىنە كوشۋگە ءجىتى نازار اۋداراتىن بولادى. مىسالى، كولىك وتە قاجەت جانە ۇزىن باعىتتارعا 10 ەلەكتروبۋس شىعارىلدى.