بيىلعى 20 جەلتوقسان مەن 2020 جىلعى 19 قاڭتار ارالىعىندا «قازاقستاننىڭ تۇرعىن ءۇي قۇرىلىس جيناق بانكى» الماتى قالاسى، الاتاۋ اۋدانى، «العاباس-6» شاعىناۋدانىنداعى نىسانعا بانك سالىمشىلارىنان قۇجات قابىلدايدى. بۇل جونىندە قالالىق تۇرعىن ءۇي ساياساتى باسقارماسى رەسمي سايتىندا حابارلادى.

قۇجاتتاردى www.baspana.kz سايتى ارقىلى تاپسىرۋعا بولادى. 6 اقپان مەن 5 ناۋرىز ارالىعىندا ءوتىنىش بەرۋشىلەردىڭ تولەم قابىلەتتىلىگى تەكسەرىلەدى. ودان ءساتتى وتكەندەر 6 ناۋرىز بەن 1 ءساۋىر ارالىعىندا تۇرعىن ءۇيدى تاڭداسا، 2 ءساۋىر كۇنى پاتەرلەر ۇلەستىرىلەدى دەپ كۇتىلۋدە.

«تازا» ارلەنگەن پاتەرلەردىڭ 1 شارشى مەترىنىڭ باعاسى 180 000 تەڭگە. ۇيلەر جايلىلىعى جونىنەن ءىV كلاسقا جاتادى.

بەرىلەتىن پاتەرلەردىڭ جالپى سانى 360. ونىڭ ىشىندە اۋماعى 66،62 شارشى مەترلىك 2 بولمەلى 180 پاتەر، اۋماعى 75،4 شارشى مەترلىك 3 بولمەلى 50 پاتەر، 87،88 شارشى مەترلىك 3 بولمەلى 130 پاتەر بار.

پاتەرلەردىڭ جارتىسى اكىمدىكتىڭ تۇرعىن ءۇي كەزەگىندە تۇرعان بانك سالىمشىلارى اراسىندا بەرىلەدى.

كونكۋرسقا قاتىسۋشىلاردىڭ جيناق شوتىندا كەمى 1 ملن تەڭگە قارجى بولۋعا ءتيىس.

ءوتىنىش بەرۋشىلەرگە قويىلعان تالاپتارمەن، قۇرىلىس نىسانىنىڭ سيپاتتاماسىمەن تولىعىراق بانكتىڭ www.baspana.kz جانە www.hcsbk.kz ينتەرنەت-رەسۋرسىندا تانىسۋعا، اسىرەسە، عيماراتتىڭ قاسبەتىن جانە پاتەرلەردىڭ جوبالانۋىن كورۋگە بولادى.