ەلوردادا تۇڭعىش پرەزيدەنت كۇنى قارساڭىندا «Nur Otan» پارتياسىنا سالتاناتتى قابىلداۋ ءوتتى. جەتەكشى پارتيانىڭ قاتارى جاس جانە بەلسەندى ازاماتتارمەن تولىقتى. ولاردىڭ قاتارىندا تانىمال ساتيرا اكتەرى، تەلەجۇرگىزۋشى تۇرسىنبەك قاباتوۆ پەن بەلگىلى بوكسشى مەيىرىم نۇرسۇلتانوۆ تا بار.
پارتيا بيلەتىن سالتاناتتى جاعدايدا تابىس ەتكەن «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك تۇڭعىش پرەزيدەنت كۇنى مەرەكەسى – ەلباسىنىڭ تاۋەلسىز ەلىمىزدىڭ قالىپتاسۋى مەن دامۋىنا سىڭىرگەن ەڭبەگىنە حالىقتىڭ كورسەتكەن ەرەكشە قۇرمەتىنىڭ بەلگىسى ەكەنىن اتاپ ءوتتى. بۇل – مەملەكەتتىك ينستيتۋتتاردىڭ قۇرىلىپ، شەكارامىزدىڭ شەگەندەلۋى جولىنداعى قازاق حالقىنىڭ تاريحي تاڭداۋ جاساعان كۇنى.
«Nur Otan» – قازاقستاننىڭ وسىپ-وركەندەۋى جولىندا ايانباي ەڭبەك ەتەتىن جانداردىڭ جۇمىلعان جەرى. ءبىزدىڭ باستى بايلىعىمىز – تاۋەلسىزدىك. «Nur Otan» پارتياسىنىڭ مىندەتى – ەلباسىنىڭ مەملەكەتتىك باعىتىنىڭ ساباقتاستىعىن قامتاماسىز ەتۋ. بۇل بىزگە ەڭ الدىمەن ەلدەگى تىنىشتىق پەن تاتۋلىقتى ساقتاپ، ادامداردى الالامايتىن مەملەكەتتە ءومىر ءسۇرۋ ءۇشىن قاجەت. تۇراقتىلىق جوق جەردە وسىپ-وركەندەۋ دە بولمايدى. وزدەرىڭىز «Nur Otan» پارتياسىنىڭ قاتارىنا قوسىلۋعا شەشىم قابىلداعان ەكەنسىزدەر. قاتارىمىزعا قوش كەلدىڭىزدەر! بۇگىندە ءبىزدىڭ قاتارىمىز 900 مىڭعا جۋىق ادامدى قۇراپ وتىر. ولار ءتۇرلى ۇلىس وكىلدەرى مەن ءتۇرلى كوزقاراستاعى، قالالار مەن شالعاي اۋىلداردا تۇراتىن ازاماتتار. ءبىز بارلىعىمىز ەلباسىنىڭ جاقتاستارى جانە ۇلكەن ءبىر وتباسىمىز» - دەدى «Nur Otan» پارتياسى ءتوراعاسىنىڭ ءبىرىنشى ورىنباسارى.
سالتاناتتى شارا بارىسىندا باۋىرجان بايبەك جينالعاندارعا تۇرسىنبەك قاباتوۆتىڭ «Nur Otan» پارتياسىنىڭ مۇشەسى بولۋعا قالاي نيەت بىلدىرگەنى تۋرالى ايتىپ بەردى.
«مەن الماتىدان نۇر-سۇلتانعا بەت العان ۇشاقتا ەدىم، قاسىمدا تۇرسىنبەك قاباتوۆ وتىردى. ءبىر جارىم ساعات بويى مەن وعان پارتيا تۋرالى، ەلباسى مەن مەملەكەت باسشىسىنىڭ باستامالارى مەن پارتيانى قايتا جانداندىرۋ اياسىندا اتقارىلىپ جاتقان جۇمىس بارىسى تۋرالى اڭگىمەلەدىم. ءبىز ۇشاقتان تۇسكەن كەزدە ول وسىناۋ اتقارىلىپ جاتقان جۇمىستارعا ءوزىنىڭ دە اتسالىسقىسى كەلەتىنىن ايتتى» - دەدى ءتوراعانىڭ ءبىرىنشى ورىنباسارى.
تۇرسىنبەك قاباتوۆتىڭ ءوزى تاۋەلسىز ەلىمىزدىڭ پارتياسى قاتارىندا ءجۇرىپ، ەل ءۇشىن قىزمەت اتقارۋدى ۇلكەن باقىت سانايتىنىن جەتكىزدى.
«ءبىز 90-جىلدارداعى توقىراۋدى كورگەن بالالارمىز. كەشە عانا اۋىلدا قوي باعىپ جۇرگەن بالا ەدىم. بۇگىندە مىنە، ارمان قۋىپ استاناعا كەلىپ، سول ارماندارىم ورىندالىپ جاتىر. مۇنىڭ بارلىعى ەلىمىزدىڭ وركەندەپ-وسكەنىنىڭ ارقاسى. ءاربىر ازىلىمدە جۇرتتى جاقسىلىققا ۇندەپ، بارلىق اڭگىمەمدە حالىقتى بىرلىككە شاقىرىپ جۇرەمىن. «Nur Otan» – جالپى حالىقتىق پارتيا. حالىق پەن بيلىكتىڭ اراسىنداعى التىن كوپىر. قازىرگى تاڭدا الەۋمەتتىك جەلىلەردە ەلدى كىم جامانداسا، سول باتىر بولىپ ەسەپتەلىپ جاتىر. مەن ولاردىڭ قاتارىندا بولعىم كەلمەيدى. قازاقتا «جالعىزدىڭ ءۇنى شىقپاس، جاياۋدىڭ شاڭى شىقپاس» دەگەن ءسوز بار. اركىم وزىنشە «باتىر» بولىپ وتىرا بەرسە، ەلىمىز دامىمايدى. ءبىز جۇدىرىقتاي جۇمىلۋىمىز كەرەك» - دەدى تۇرسىنبەك قاباتوۆ.
بۇگىن «Nur Otan» پارتياسىنىڭ قاتارىنا اسقار ءابدىقالىق تا قوسىلدى. 19 جاسار اسقار ءابدىقالىقتى بۇعان دەيىن مەملەكەت باسشىسى قاسىم-جومارت توقايەۆ ارىس قالاسىندا ورىن العان جارىلىس كەزىندە 80 بالانى كولىكپەن قالا سىرتىنا امان الىپ شىققانى ءۇشىن ارنايى «ەرلىگى ءۇشىن» مەدالىمەن ماراپاتتاعان ەدى.
سونىمەن قاتار، باۋىرجان بايبەك «قاسيەتتى جول» قايىرىمدىلىق قورى قامقورشىلىق كەڭەسىنىڭ مۇشەسى ديانا ەرلانعا، پەتروپاۆلدان كەلگەن جاس كاسىپكەر جانات قيقىموۆقا، «وتىرار تV» مەديا-حولدينگىنىڭ ديرەكتورى ايگەرىم جۇماقۇلوۆاعا جانە «مى يز شاحتينسكا» ەرىكتىلەر بىرلەستىگىنىڭ مۇشەسى يۋليا گولوۆيناعا پارتيا بيلەتىن تاپسىردى. جالپى، بۇگىن ەلىمىز بويىنشا «Nur Otan» پارتياسىنىڭ قاتارىنا 2 مىڭعا جۋىق قازاقستاندىق مۇشە بولدى.
