مەديسينالىق ساقتاندىرۋ قورى 2019 جىلدىڭ ون ايىندا رەسپۋبليكا تۇرعىندارىنا كورسەتىلگەن تەگىن مەديسينالىق كومەك ساپاسىن باقىلاۋ جۇمىستارىنىڭ ناتيجەسىن قورىتىندىلادى. مونيتورينگ ناتيجەسىندە الماتى قالاسى بويىنشا 347 ملن تەڭگەنىڭ قىزمەتى ءتۇرلى كەمشىلىكتەرمەن كورسەتىلگەنى انىقتالدى. بۇل تۋرالى «الەۋمەتتىك مەديسينالىق ساقتاندىرۋ قورى» كەاق الماتى فيليالى حابارلادى.

مەديسينالىق ساقتاندىرۋ قورىنىڭ باسپا ءسوز قىزمەتى تاراتقان حابارلاماعا سۇيەنسەك، كەمشىلىكتىڭ باسىم بولىگى ستاسيونارلىق جانە ستاسيوناردى الماستىراتىن كومەك ۇيىمدارىنا تيەسىلى. مونيتورينگ ناتيجەسىندە ولاردان 284 ملن تەڭگەدەن استام قارجى قايتارىپ الىنعان. كونسۋلتاتيۆتىك-دياگنوستيكالىق كومەك ۇيىمدارى 11،7 ملن تەڭگەنىڭ قىزمەتىن كەمشىلىكپەن كورسەتكەنى بەلگىلى بولدى. قالعان 11،9 ملن تەڭگەدەن استام ايىپپۇل جەدەل جاردەم، قان قىزمەتى مەن پاتولوگواناتوميالىق قىزمەت سۋبەكتىلەرىنە سالىندى.

– مونيتورينگ بارىسىندا انىقتالعان كەمشىلىكتەردىڭ دەنى ەمدەۋ-دياگنوستيكا بارىسىندا بەلگىلەنگەن ستاندارتتاردان اۋىتقۋ، مەديسينالىق قۇجاتتاردى دۇرىس تولتىرماۋ، قىزمەت باعاسىن نەگىزسىز ءوسىرۋ سىندى ولقىلىقتارعا كەلىپ سايادى. سونىمەن قاتار، كورسەتىلدى دەپ جازىلعان بەلگىلى ءبىر قىزمەت تۇرلەرىنىڭ شىن مانىندە كورسەتىلگەنىن راستاي الماعان كلينيكالار دا بار، – دەدى مسق الماتى فيليالىنىڭ مەديسينالىق قىزمەت ساپاسىن باقىلاۋ ءبولىمى باسشىسى اسەم ماناپبايەۆا.

ونىڭ ايتۋىنشا، قازىرگى تاڭدا مونيتورينگ مەنشىك قۇقىعىنا قاراماستان، مەملەكەتتىك تاپسىرىس العان بارلىق مەديسينا ۇيىمدارىندا جۇرگىزىلەدى. جىل باسىنان بەرى ساراپتامانىڭ ءۇش دەڭگەيلى ۇلگىسى قولدانىسقا ەنگىزىلدى. ناقتىراق ايتقاندا، ادام ءولىمى بولعان جاعدايدا ساراپتاما ەمحانالىق-امبۋلاتورلىق كومەك، جەدەل جاردەم جانە ستاسيونار دەڭگەيىندە (سىرقاتتىڭ ەم-دوم الۋ ءۇشىن ءجۇرىپ وتكەن مارشرۋتى بويىنشا) جاسالىپ، جىبەرىلگەن كەمشىلىكتەردىڭ ءوزارا بايلانىسى انىقتالادى.

ەستەرىڭىزگە سالا كەتسەك، وڭتۇستىك استانادا 178 مەديسينا ۇيىمى مەملەكەتتىك تاپسىرىس شەڭبەرىندە حالىققا تەگىن كومەك كورسەتىپ جاتىر. ولارمەن بەكىتىلگەن كەلىسىمشارتتىڭ جالپى سوماسى 117،3 ملرد تەڭگەدەن اسادى.