4 جەلتوقسان كۇنى پەدياتريا جانە بالالار حيرۋرگياسى عىلىمي ورتالىعىندا ستاسيوناردا جاتقان ناۋقاس بالالار ءبىلىم الاتىن ەكىنشى «Smart School» وقۋ سىنىبى اشىلدى.
يننوۆاسيالىق وقۋ كلاسى – اق قان اۋرۋىنا، ونكولوگيالىق دەرتكە، سيرەك اۋرۋلارعا شالدىققان بالالارعا ارنالعان. ەمدەلۋ ۇزاق ۋاقىتتى تالاپ ەتەتىندىكتەن، مۇندا بالالار جىلداپ جاتادى. سوعان قاراماستان ەندى، ورتالىقتا ەم الىپ جاتقان بالالار ەمىن ۇزبەي، زامانداستارىنان قالماي، بىلىمدەرىن ودان ءارى جەتىلدىرىپ، بوس ۋاقىتتارىن ءتيىمدى وتكىزە الاتىن بولادى.
وزىق قوندىرعىلارمەن جابدىقتالعان سمارت كلاسستى پەدياتريا ورتالىعىنىڭ باسشىسى ريزا بورانبايەۆا اشتى. سونىمەن قاتار اشۋ قۇرمەتى اتا-انالاردىڭ ىشىندەگى جاسى ۇلكەنىنە بەرىلدى.
– بۇگىن ءبىز ءۇشىن، وسىندا ەم الىپ جاتقان بالالار مەن ولاردىڭ اتا-انالارى ءۇشىن قۋانىشتى كۇن. بالالارعا ۇلكەن قۋانىش سىيلاعان، كەڭ، اسەم دە جارىق سىنىپتى جاساپ، زامان تالابىنا ساي جابدىقتاپ بەرگەن دەمەۋشىلەرگە، اتسالىسقان ەرىكتىلەرگە بارشا قاۋىم اتىنان شەكسىز العىسىمىزدى بىلدىرەمىز. ورتالىعىمىزدا اشىلىپ وتىرعان ەكىنشى سمارت-كلاسستىڭ بالالاردىڭ دەنساۋلىعىن جاقسارتۋعا قوسار ۇلەسى مول بولارى ءسوزسىز دەپ بىلەمىن، – دەدى پەدياتريا ورتالىعىنىڭ باسشىسى ريزا بورانبايەۆا اشىلۋ سالتاناتىندا.
«Smart School-2» سىنىبى ءۇش كابينەتتەن تۇرادى. زاماناۋي قۇرالدارمەن جابدىقتالعان وقۋ سىنىبىندا بالالار ماتەماتيكا، تاريح، اعىلشىن ءتىلى جانە ت.ب. جالپى پاندەرمەن بىرگە، مەكتەپكە دەيىنگى باعدارلامانى وقىپ، بوس ۋاقىتتارىندا اعىلشىن ءتىلىن ۇيرەنىپ، شاحمات، روبوتوتەحنيكا، كونسترۋكتور قۇراۋ، سۋرەت سالۋ سىندى شىعارماشىلىق جۇمىستارمەن دە اينالىسا الادى. سونداي-اق بۇل سىنىپتا مۋزىكا مەن ەرتەگىلەردىڭ كومەگىمەن تەراپيا سەانستارى وتكىزىلەدى. بارلىق ساباقتار مەن ۇيىرمەلەر تەگىن جۇرگىزىلەدى. جوبا اياسىندا ەمحانا سايقىمازاعى (كلوۋنى) بالالاردىڭ كوڭىلىن كوتەرىپ، ءتۇرلى كەشتەر ۇيىمداستىرىپ، قۋانتىپ وتىرماق. سىنىپ ۇلكەن ينتەراكتيۆتى تاقتامەن، ەكولوگيالىق تازا جيھازدارمەن قامتاماسىز ەتىلگەن. زامان تالابىنا ساي ارلەنىپ، بەزەندىرىلگەن. وقۋ ءۇردىسى جاڭا ازىرلەمەلەردىڭ ارقاسىندا ناتيجەلى ءارى قىزىقتى بولا تۇسەدى دەپ سەنەمىز.
– جاڭا سىنىپتىڭ اشىلۋى ەمدەلىپ جاتقان بالالار ءۇشىن پسيحولوگيالىق تۇرعىدا ۇلكەن كومەگىن بەرە وتىرىپ، بويلارىنداعى قابىلەتتەرىن اشۋعا دا جاڭا مۇمكىندىكتەر بەرەدى. زاماناۋي تەحنولوگيالاردىڭ كومەگىمەن ولار قۇرداستارىنان ارتتا قالماي، زياتكەرلىك جانە شىعارماشىلىق قابىلەتتەرىن دامىتا الادى. اتاپ وتە كەتەيىن، كىشكەنتاي پاسيەنتتەرگە اتا-انالارمەن جانە بالالارمەن ءتىل تابىسا الاتىن بىلىكتى ماماندار، ەرىكتىلەر ءدارىس بەرەدى. ءبىزدى ەڭ قۋانتاتىنى، بالالار ستاسيوناردا ۇزاق مەرزىمدە ەم الا وتىرىپ، وقۋ پروسەسىنەن قالىس قالمايتىن بولادى، – دەيدى «Help Today» قوعامدىق قورىنىڭ باسشىسى ەلميرا الييەۆا.
ونىڭ ايتۋىنشا، سىنىپتا الداعى ۋاقىتتا اتا-انالار ءۇشىن پسيحولوگيالىق قولداۋ كۋرستارى اشىلماق.
شارا بارىسىندا №3 ونكوگەماتولوگيا ءبولىمى اتا-انالارى اتىنان ءسوز سويلەگەن مادينا قۇنانبايەۆا بالالار ءۇشىن جاسالىپ جاتقان قايىرىمدى ءىس ءۇشىن بارشا قاۋىمعا العىسىن ءبىلدىردى.
وزىق قوندىرعىلارمەن جابدىقتالعان وقۋ سىنىبى «Help Today» قوعامدىق قورىنىڭ قولداۋىمەن جانە «Samsung Electronics Central Eurasia»، «Universal Masters»، «باي-تەمير»، «BioMarin Europe Limited» كومپانيالارىنىڭ دەمەۋشىلىگىمەن ىسكە استى.
ءىس-شارا ونەر قايراتكەرلەرىنىڭ قاتىسۋىمەن وتكەن شاعىن كونسەرتتىك باعدارلامامەن اياقتالدى.
«پەدياتريا جانە بالالار
حيرۋرگياسى عىلىمي ورتالىعى»
باسپا ءسوز قىزمەتى
پىكىر قالدىرۋ