تاياۋدا پرەزيدەنت قاسىم-جومارت توقايەۆ 2020-2022 جىلدارعا ارنالعان مەملەكەتتىك بيۋدجەتكە قول قويدى. وسى ورايدا Qamshy.kz اقپارات اگەنتتىگى 2020 جىلى ەڭ تومەنگى زەينەتاقى مەن ەڭبەكاقى مولشەرى، ايلىق ەسەپتىك كورسەتكىش پەن ەڭ تومەنگى كۇنكورىس دەڭگەيىنىڭ قانشا بولاتىنىن، الەۋمەتتىك جاردەماقى كىمدەرگە بەرىلىپ، كىمدەردىڭ جالاقىسىنا ۇستەماقى قوسىلاتىنىن انىقتاپ كوردى.
2020 جىلى ەڭ تومەنگى ەڭبەكاقى مولشەرى (42 500 تەڭگە) وزگەرىسسىز قالادا. ال مەملەكەتتىك بازالىق زەينەتاقى مولشەرى 16 839 تەڭگە، زەينەتاقىنىڭ ەڭ تومەنگى مولشەرى 38 636 تەڭگە بولادى.
ايلىق ەسەپتىك كورسەتكىش 2651 تەڭگەنى قۇراسا، ەڭ تومەنگى كۇنكورىس دەڭگەيى 31 183 تەڭگەگە تەڭەستىرىلمەك.
تىشقان جىلىندا كوپبالالى وتباسىلارعا ارنالعان الەۋمەتتىك كومەكتىڭ جاڭا ءتۇرى ۇسىنىلادى. وتباسىلىق تابىس ەسكەرىلمەستەن 4 بالاسى بار وتباسىلارعا 42 500 تەڭگە، 5 بالاعا – 53 125 تەڭگە، 6 بالاعا – 63 750 تەڭگە، 7 جانە ودان دا كوپ بالالارعا 74 375 تەڭگە تولەنەدى.
2020 جىلى اتاۋلى الەۋمەتتىك كومەكتى بەرۋ دە جالعاسىن تابادى. ەسكەرە كەتەتىنى، مەملەكەت اتالمىش جاردەماقىنى تاعايىنداۋدا وتباسىلىق تابىستى ەسەپتەپ، وسى ارقىلى جاردەماقىنى شىنايى مۇقتاج ازاماتتاردىڭ عانا الۋىن قامتاماسىز ەتپەك. بۇل ءۇشىن ەڭبەككە قابىلەتتى وتباسى مۇشەسىنە جۇمىس ۇسىنىلادى. جۇمىستان باس تارتقان جاعدايدا، ااك تولەمى تۇتاس وتباسى ءۇشىن توقتاتىلادى.
سونداي-اق 2020 جىلعى 1 قاڭتاردان باستاپ مۇعالىمدەردىڭ جالاقىسى 25%-عا، مادەنيەت سالاسىنداعى قىزمەتكەرلەردىڭ ەڭبەكاقىسى 35%-عا، كەيبىرىنىڭ جالاقىسى 50%-عا دەيىن، الەۋمەتتىك سالا قىزمەتكەرلەرىنىڭ ەڭبەكاقىسى 30-60%-عا دەيىن ارتادى.
