كۇنى كەشە 63-كە تولعان يمانعالي تاسماعامبەتوۆ زەينەت دەمالىسىنا كەتەدى-مىس دەگەن اڭگىمە الەۋمەتتىك جەلىدە جەلدەي ەسۋدە. كەزىندە ءىس جۇزىندە يمانعالي تاسماعامبەتوۆ رەسەيگە ەلشى بولىپ تاعايىندالعان ءسات ونىڭ ساياسي ساحنادان كەتۋىنىڭ باسى دەۋشىلەر از بولمادى. بيلىك ەرمۇحامەت ەرتىسبايەۆ سەنارييىن يمانعالي نۇرعاليۇلىنا قاتىستى قولدانا ما؟

ەرتىسبايەۆ سەنارييى كوپتىڭ ەسىندە. ۇزاق جىلدار پرەزيدەنتتىڭ ساياسي ماسەلەلەر جونىندەگى كەڭەسشىسى دە، مينيستر دە، ساياسي ساراپشى دا بولعان ونىڭ داۋىرلەپ تۇرعان كەزەڭىنە 2013 جىلى نۇكتە قويىلدى. ەلدەن ەلشى بولىپ كەتكەن ول وتانىنا زەينەتتىك دەمالىسقا شىعىپ ءبىر-اق ورالدى.

نازاربايەۆتىڭ سەنىمدى سەرىگى بولعان مارات تاجين دە ۇلكەن ويىننان وسى جولمەن شىعارىلاتىنعا ۇقسايدى. بۇگىندە ول – قارت قۇرلىقتا. زەينەتتىك دەمالىسقا دەيىنگى 4 جىلىن چەحياداعى توتەنشە جانە وكىلەتتى ەلشى قىزمەتىندە وتكىزەتىن سەكىلدى.

ال تاسماعامبەتوۆتىڭ الداعى تاعدىرى بولەك اڭگىمەنىڭ تاقىرىبى رەتىندە قارالا ما؟ ولاي ىستەۋگە تولىقتاي نەگىز بار.

ويتكەنى تاسماعامبەتوۆ تاۋەلسىزدىك تاريحىنداعى ءىرى ساياساتكەر. وعان دەگەن ەلدىڭ ىقىلاسى دا ەرەكشە. ءالى دە بولسا، ونى ۇلكەن ساياساتتان كورگىسى كەلەتىندەر كوپ.

ساياساتتانۋشى ەربول ەدىلوۆتىڭ ءوزىنىڭ دەرەككوزدەرىنە سۇيەنىپ ايتۋىنشا، تاسماعامبەتوۆ ورنىنان بوساتۋىن كۇتپەستەن ءوزى باستاما كوتەرىپ، قىزمەتتەن ءوزى كەتەدى. زاڭ شەڭبەرىندە. ۇسىنىلۋى بەك مۇمكىن سەناتتاعى قىزمەتتەن دە باس تارتادى.

وسىلايشا، ساياسي مانسابىنا ادەمى نۇكتە قويماق. ءتىپتى ول تۋرالى "ءوتىنىش تە بىلدىرگەن" دەگەندى ايتادى ساياساتتانۋشى.