قازاقستاننىڭ ءبىلىم جانە عىلىم مينيسترلىگى قوسىمشا تەكسەرۋ جۇمىستارىن جۇرگىزە كەلە، 5 جوعارى وقۋ ورنىنىڭ ليسەنزياسىن ۋاقىتشا توقتاتۋ تۋرالى شەشىم قابىلدادى. بۇل تۋرالى بۇگىن، 11 جەتوقساندا وتكەن باسپا ءسوز جيىنىندا مينيستر اسحات ايماعانبەتوۆ مالىمدەدى. 

ءمينيستردىڭ ايتۋىنشا، ۋنيۆەرسيتەتتەردىڭ ليسەنزياسىن ۋاقىتشا توقتاتۋ پرەزيدەنت قاسىم-جومارت توقايەۆتىڭ تاپسىرماسىنا سايكەس جۇرگىزىلگەن. 

- ءبىز بۇعان دەيىن، ەلىمىزدە 5 جوو ليسەنزياسىنىڭ ۋاقىتشا توقتاتىلعانىن حابارلاعان بولاتىنبىز. بۇگىندە جوو-نا قوسىمشا تەكسەرۋ جۇمىستارىن جۇرگىزۋدەمىز، سونىڭ ناتيجەسىندە تاعى 5 جوو-نىڭ ليسەنزياسىن ۋاقىتشا توقتاتۋ تۋرالى شەشىم قابىلدادىق. شەشىممەن كەلىسپەيتىن جوو-نىڭ زاڭ بويىنشا شاعىمدانۋعا 10 كۇن ۋاقىتى بار. ەگەر شاعىم تۇسپەسە نەمەسە شاعىمدانعان جاعدايدىڭ وزىندە سوت شەشىمدى وزگەرتپەسە، ءبىز ولاردىڭ اتاۋلارىن جاريالاي الامىز. جالپى جوو بويىنشا پروبلەمالار جەتكىلىكتى. انىقتالعانداي، 1 كۋرسقا 5 ستۋدەنت قابىلدانسا، 4 كۋرستى 150 ستۋدەنت ءبىتىرىپ شىعادى. دەمەك 2،3 كۋرستاردا جاۋاپسىز ۋنيۆەرسيتەتتەر وقۋدان شىعىپ قالعان ستۋدەنتتەردى قابىلدايدى. مەملەكەت باسشىسىنىڭ تاپسىرماسىنا سايكەس، ءبىز جوو-نا دەگەن تالاپتى كۇشەيتتىك جانە جوعارى ءبىلىم بەرۋ سالاسىن رەتتەۋدىڭ جاڭا مەحانيزمدەرى ەنگىزىلەتىن بولادى"، - دەدى اسحات ايماعامبەتوۆ مينيسترلىكتە وتكەن باسپا ءسوز ءماسليحاتىندا.

بۇعان دەيىن پرەزيدەنت توقايەۆ "ديپلوم تاراتاتىن كونتورعا اينالعان جوو-لارعا قاتال شارالار قابىلدانۋى ءتيىس" دەگەن ەدى.