الماتى اكىمى باقىتجان ساعىنتايەۆ الماتى اتاۋىن وزگەرتۋ تۋرالى باستامادان بەيحابار ەكەنىن مالىمدەدى. بۇل تۋرالى ول بۇگىن، 15 جەلتوقساندا ءوزىنىڭ Instagram-داعى پاراقشاسىندا جازدى.
"بۇگىن الماتى قالاسىنىڭ اتاۋىن وزگەرتۋ تۋرالى اقپارات پايدا بولدى. مەن بۇل ماسەلەنى قاراستىرماعانىمدى ايتقىم كەلەدى جانە اكىمدىكتىڭ كۇن تارتىبىندە بۇل ماسەلە جوق. قازىرگى ۋاقىتتا ءبىز قالا ءۇشىن پرەزيدەنت قاسىم-جومارت توقايەۆتىڭ العا قويعان كەشەندى مىندەتتەرىن شەشۋ جولىندا جۇمىس ىستەپ جاتىرمىز. جاقىندا قابىلدانعان "الماتى - 2050" ستراتەگياسىن، قىسقا جانە ورتا مەرزىمدى جوسپارلاردى ىسكە اسىرۋ بويىنشا جۇمىستاردى جۇرگىزۋدەمىز" - دەپ جازدى ساعىنتايەۆ.
بۇعان دەيىن ءبىرقاتار باق-تا اقىن ولجاس سۇلەيمەنوۆتىڭ پرەزيدەنتپەن كەزدەسكەنى، كەزدەسۋدە "الماتى اتاۋىن "الما-اتا" دەپ وزگەرتۋ باستاماسىن پرەزيدەنت قولدادى" دەگەن سىڭايدا اقپارات تاراعان بولاتىن.
ال 15 جەلتوقسان كۇنى تۇستەن كەيىن پرەزيدەنت كەڭەسشىسى ەرلان قارين ءوزىنىڭ Telegram كانالىندا بۇل باستاما جايلى پرەزيدەنت قاسىم-جومارت توقايەۆتىڭ ويىن جەتكىزگەن. سول جازبادا قارين توقايەۆتىڭ "مۇنداي ماسەلەلەر كابينەتتە عانا ەمەس، قالا تۇرعىندارىنىڭ باسىم كوپشىلىگىنىڭ ۇستانىمى نەگىزىندە، ازاماتتاردىڭ ويىن ءبىلىپ بارىپ شەشىلۋى كەرەك" دەپ ەسەپتەيتىنىن جازعان.
پىكىر قالدىرۋ