تاۋەلسىزدىك كۇنىن مەرەكەلەۋ داستۇرگە ساي «تاۋەلسىزدىك» مونۋمەنتىنە گۇل شوقتارىن قويۋ راسىمىنەن باستالدى.

سالتاناتتى راسىمگە الماتى قالاسىنىڭ اكىمى باقىتجان ساعىنتايەۆ، قالا اكىمىنىڭ ورىنباسارلارى، اۋدان اكىمدەرى مەن باسقارما باسشىلارى قاتىستى. سونىمەن قاتار، تاۋەلسىزدىك مونۋمەنتىنىڭ الاڭىندا قازاقستان حالقى اسسامبلەياسىنىڭ مۇشەلەرى مەن ەتنومادەني بىرلەستىكتەردىڭ وكىلدەرى، 1986 جىلعى وقيعاعا قاتىسۋشىلار، اۋعان سوعىسى ارداگەرلەرى، چەرنوبىل ارداگەرلەرى، قالانىڭ جاستار ۇيىمدارىنىڭ وكىلدەرى، سونداي-اق قازاقستاننىڭ ەسترادا جۇلدىزدارى روزا رىمبايەۆا، ساكەن مايعازييەۆ، ايدانا مەدەنوۆا كەلدى.
«بۇل اتاۋلى كۇننىڭ وڭايلىقپەن كەلمەگەنىن وزىمىزگە جانە وسكەلەڭ ۇرپاقتىڭ ساناسىنا تاعى ەسكە سالامىز. 28 جىل بۇرىن ءبىز تۇڭعىش پرەزيدەنت – ەلباسى نۇرسۇلتان نازاربايەۆتىڭ اينالاسىنا توپتاسىپ، وسى ارمانىمىزدى جۇزەگە اسىرا الدىق. الماتى تاريحي وزگەرىستەردىڭ ورتاسىندا بولدى. الماتىلىقتار بەيبىتشىلىك پەن تىنىشتىقتىڭ ماڭىزدىلىعىن ءبىر كىسىدەي بىلەدى. ءبىز قالانى كوركەيتە وتىرىپ، وتباسى يگىلىگى ءۇشىن ەرتەڭگە دەگەن نىق سەنىممەن ءومىر ءسۇرىپ، جۇمىس ىستەي الامىز» دەپ جازدى قالا اكىمى باقىتجان ساعىنتايەۆ ءوزىنىڭ Instagram پاراقشاسىندا. وسىلايشا ول قازاق ەلىن تاۋەلسىزدىك كۇنىمەن قۇتتىقتادى.
گۇل شوقتارىن قويۋ راسىمىنەن كەيىن مىڭنان استام جينالعاندار مەرەكەگە ارنالعان جاپپاي فلەشموبقا قاتىسىپ، «مەن قازاقپىن» ءانىن ورىندادى.
ەستەرىڭىزگە سالا كەتەيىك، تاۋەلسىزدىك كۇنىنە ورايلاستىرىلعان «مەن قازاقپىن» چەللەندجىن پاۆلودارلىق وقۋشىلار الەۋمەتتىك جەلىلەردە تاراتقان بولاتىن.