دۋبايدا الەمدەگى ەڭ بيىك عيمارات بۋردج حاليفانىڭ سىرتقى كورىنىسىن قازاقستان تۋى تۇستەس ەتۋ ارقىلى تاۋەلسىزدىك كۇنىمەن ەرەكشە قۇتتىقتاعان ءساتتىڭ ۆيدەوسى الەۋمەتتىك جەلىلەردە تاراعان بولاتىن. باستاما بىرىككەن اراب امىرلىكتەرى تارىپىنان قولعا الىنعانى بەلگىلى بولدى.
"امىرلىكتەردىڭ بۇل يگى ءىسى ءوزارا تۇسىنىستىك، قۇرمەت پەن سەنىم اۋانىنداعى ەكىجاقتى قارىم-قاتىناستىڭ جوعارى دارەجەسىن تاعى ءبىر مارتە كۋالاندىرادى"، دەلىنگەن سىرتقى ىستەر مينيسترلىگى باسپا ءسوز قىزمەتىنىڭ مالىمدەمەسىندە.
تاۋەلسىزدىك مەرەكەسىنە وراي بىرىككەن اراب امىرلىكتەرىنىڭ پرەزيدەنتى حاليفا بەن زايد ءال ناحاياننىڭ قازاقستان پرەزيدەنتى قاسىم-جومارت توقايەۆتىڭ اتىنا جولداعان قۇتتىقتاۋىندا "ءسىزدى جانە دوستاس حالقىڭىزدى تاۋەلسىزدىك كۇنىمەن شىن جۇرەكتەن قۇتتىقتايمىن. جوعارى مارتەبەلى، سىزگە زور دەنساۋلىق، باقىت پەن ساتتىلىك، ال دوستاس حالقىڭىزعا يگىلىك پەن ىرىس تىلەيمىن"، دەلىنگەن.
ەسكەرتە كەتەلىك، حاليفا مۇناراسى الەمدەگى ەڭ بيىك عيمارات. ونىڭ بيىكتىگى جەردەن ۇشارباسىنا دەيىن 828 مەتردى قۇرايدى.
پىكىر قالدىرۋ