بۇگىن، 25 جەلتوقساندا الماتى وبلىسى اقسۋ اۋداندىق سوتىندا "جۇڭگو جۇمىسشىلارىمەن توبەلەستى" دەپ ايىپتالعان قىزىلاعاش اۋىلىنىڭ بەس تۇرعىنىنا قاتىستى سوت ۇكىمى شىقتى. بۇل تۋرالى Qamshy.kz اقپارات اگەنتتىگىنىڭ الماتى وبلىسىنداعى ءتىلشىسى حابارلادى.
ونىڭ حابارلاۋىنشا، سوت بەرىك رىسالدينوۆ پەن سارقىت سالحانوۆتى 2 جىل 6 ايعا، ال نۇربول مۇحامەتالين، بەيبىت مۇحامەتالين جانە ەركىن سالحانوۆتىڭ باس بوستاندىعى 2 جىلعا شەكتەۋ تۋرالى ۇكىم ەتكەن.
كەشە قىزىلاعاش اۋىلىنىڭ بەس تۇرعىنىنا قاتىستى سوت وتىرىسى بۇگىن ساعات 15.00-دە وتەتىنى حابارلانعان. الايدا سوت رەسمي مالىمدەمەستەن 5 جىگىتتىڭ سوتىن بۇگىن تۇسكە دەيىن وتكىزىپ، ولاردى شارتتى مەرزىمگە كەسىپ، بوستاندىققا شىعارعان. اقسۋ اۋداندىق سوتى عيماراتىنىڭ الدىندا بەس جىگىتتىڭ قولداۋشىلارى سوتتىڭ جابىق جاعدايدا وتكەنىنە، وتىرىس ۋاقىتىنىڭ اۋىستىرىلعانىنا، ونى ەشكىمگە حابارلاماعانىنا نارازىلىقتارىن ءبىلدىردى.
بيىل 7 قازاندا الماتى وبلىسى اقسۋ اۋدانىندا جول سالىپ جاتقان "Citic Construction" كومپانياسىنداعى قىتايدىڭ ءتورت جۇمىسشىسى اراسىندا جانجال باستالىپ، كەيىن توبەلەسكە ۇلاسقان. توبەلەستەن قازاقستاندا تۇراقتى تۇرۋعا رۇقساتى بار جۇڭگو ازاماتى – ەتنيكالىق قازاق جاراقاتتانعان. كەلەسى كۇنى قىزىلاعاش اۋىلىنىڭ بەس تۇرعىنى مەن قىتايلىق جۇمىسشىلار اراسىندا توبەلەس بولعان. پوليسيا وسى ىسكە كۇدىكتى رەتىندە قىزىلاعاش اۋىلىنىڭ بەس تۇرعىنىن قاماۋعا الدى. 10 قازان كۇنى سۋديا قىزىلاعاش اۋىلىنىڭ بەس ازاماتىن ەكى ايعا قاماۋ تۋرالى شەشىم شىعار ەدى.
قىتايلىق ازاماتتارمەن توبەلەستى دەلىنىپ، قىلمىستىق كودەكستىڭ 293 بابى 3-تارماعى بويىنشا (قارۋ نەمەسە سۋىق قارۋ قولدانىپ دەنساۋلىققا زيان كەلتىرۋ) بابى بويىنشا ايىپتالعان قىزىلاعاش اۋىلىنىڭ بەس تۇرعىنىنا قاتىستى سوت وتىرىسى 20 جەلتوقساندا باستالعان بولاتىن. سۋديا ول كۇنى جابىرلەنۋشى تاراپ - جۇڭگو جۇمىسشىلارىنىڭ سوتقا كەلمەۋىنە بايلانىستى سوت وتىرىسىن 24 جەلتوقسانعا قالدىردى. ال كەشە، 24 جەلتوقساندا وتكەن ەكىنشى سوت وتىرسىندا جابىرلەنۋشى تاراپتىڭ كەلمەۋىنە بايلانىستى سوت تاعى دا كەيىنگە شەگەرىلگەن. وعان نارازى بولعان ايىپتالۋشىلاردىڭ جاقتاستارى سوت عيماراتىنىڭ سىرتىندا قىزىلاعاشتىق بەس جىگىت وتىرعان گازەلدى جىبەرمەي، ولاردى بوساتۋدى تالاپ ەتكەن ەدى. ارنايى جاساق نارازى ادامداردى تاراتۋعا تىرىسقانىمەن، "بوستاندىق!" دەپ ايقايلاعان جۇرت كولىكتىڭ جۇرۋىنە مۇكىندىك بەرگەن جوق. وسى كەزدە اۋداندىق پروكۋروردىڭ ورىنباسارى ادىلەت اسقار ۇلى كەلىپ، "ايىپتالۋشىلاردىڭ پروسەسسۋالدىق كەلىسىمگە كەلىپ جاتقانىن، ول كەلىسىم بىتكەن سوڭ بەس جىگىت سوت زالىنان بوساتىلاتىن" ايتتى. نارازى حالىق سودان كەيىن عانا تارادى.
پىكىر قالدىرۋ