سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتىنىڭ باستاماسىمەن  جەمقورلىق ىندەتىن جويۋ ماقساتىندا تۇسىرىلگەن «1424» كوركەم ءفيلمىنىڭ   العاشقى اشىق كورسەتىلىمى ءوتتى.

         تۇرەن سالعان تاقىرىپتى تەرەڭ قاۋزاپ، قوعام كەلبەتىن شەبەر ايشىقتاعان كينوكارتينانىڭ اشىق كورسەتىلىمىنە ءوڭىر باسشىسى  ءومىرزاق شوكەيەۆ ارنايى قاتىسىپ،  قازاق كينو كەڭىستىگىنە جول تارتقان كوركەم ءفيلمدى كوپشىلىك كورەرمەنمەن بىرگە وتىرىپ تاماشالادى.

         وبلىس ورتالىعىندا العاش رەت تۇسىرىلگەن كينوتۋىندى، ەڭ الدىمەن قوعامدا بەلەڭ العان جەمقورلىق كورىنىستەرىن ازايتۋعا جانە وعان قارسى مادەنيەتتىڭ جارقىن ۇلگىسىن قالىپتاستىرۋعا، سونداي-اق  حالىقتىڭ ازاماتتىق بەلسەندىلىگىن ارتتىرۋ ارقىلى سىبايلاستىق دەرەكتەرىن سەيىلتۋگە باعىتتالعان.

         قوعام ومىرىنەن الىنعان كينوفيلمدە وڭاي ولجاعا قۇنىققان شەندىنىڭ ايلالى ارەكەتتەرى مەن اتا-اناسىنان ەرتە ايىرىلىپ، تاعدىر تاۋقىمەتىن بالا كۇننەن تارتقان اعايىندىلاردىڭ باسپانا ءۇشىن بايەك بولۋى كەڭىرەك باياندالادى. سونداي-اق، كوركەم فيلمدە جەڭ ۇشىنان جالعاسقان جەمقورلىققا جول بەرگەن ازاماتتار زاڭ الدىندا جاۋاپقا تارتىلاتىندىعى مەن ادال ەڭبەكتىڭ ءارقاشان ۇستەمدىك ەتەتىنى شەبەر سۋرەتتەلەدى.

         ادال جولعا ۇندەيتىن كينوكارتينا سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتىنىڭ باسشىسى، گەنەرال حاكيم كوشقالييەۆتىڭ يدەياسى نەگىزىندە ءتۇسىرىلىپ، بۇگىندە  قوعام ومىرىنە نەگىزدەلگەن بىرەگەي تۋىندى رەتىندە قازاق كينويندۋسترياسىنىڭ قاتارىن تولىقتىرىپ وتىر.

         «1424» كوركەم ءفيلمىنىڭ وزىندىك ەرەكشەلىگى – بارلىق رولدەردى دەپارتامەنت قىزمەتكەرلەرى مەن ارىس قالاسىنداعى «ت.تاجىبايەۆ اتىنداعى بالالار اۋىلىنىڭ» تاربيەلەنۋشىلەرى سومدايدى ءارى كاسىبي ارتىستەردىڭ قاتىسۋىنسىز-اق قالىڭ كورەرمەننىڭ كوڭىلىن كولەڭكەلى قىلمىستان الشاق بولۋعا جانە ونى جويۋدا ازاماتتىق بەلسەندىلىكتى تانىتۋعا ۇندەيدى.

كينو نارىققا جاڭادان قوسىلعان تىڭ تۋىندى باس-اياعى 3 اپتا ىشىندە ارىس جانە تۇركىستان قالالارىندا ءتۇسىرىلىپ، جارتى ساعاتتىق كوركەم فيلم نۇسقاسىندا قىراعى كورەرمەن نازارىنا ۇسىنىلىپ وتىر.

كورسەتىلىم جيىنىندا فيلم رەجيسسەرى باقىتجان بوتابەكوۆ ءتۇسىرىلىم جۇمىستارىنىڭ قازان ايىنىڭ سوڭى مەن قاراشا ايىنىڭ باسىندا جۇرگىزىلگەنىن تىلگە تيەك ەتىپ، شىعارماشىلىق جولدان الىس جۇرگەن دەپارتامەنت قىزمەتكەرلەرى مەن باستى ءرولدى جوعارى دەڭگەيدە سومداپ شىققان ارىستاعى بالالار اۋىلىنىڭ تاربيەلەنۋشىلەرى ايگۇل اقجىگىتوۆا مەن قۇدايبەرگەن قايرات ۇلىنىڭ قابىلەتتەرىنە ءتۇسىرىلىم بارىسىندا ءتانتى بولعانىن ايرىقشا اتاپ ءوتتى.

         سونداي-اق، ادامگەرشىلىك پەن ادىلەتسىزدىك قاتار بەينەلەنگەن ءفيلمدى تاپجىلماي تاماشالاعان قالىڭ كورەرمەننىڭ ءبىرى «قوعام كەلبەتىن جارتى ساعاتقا سىيعىزىپ، كوپشىلىك ساناسىنا جەتكىزۋ – ۇزدىكسىز ەڭبەك پەن ۇلكەن شەبەرلىكتىڭ ناتيجەسى»،-دەپ پايىمدى پىكىر بىلدىرسە،  ءبىرى «بۇل فيلم پايداكۇنەم پەندەلەردىڭ سىرەسكەن  وي-ساناسىن سىلكىنتۋگە سەپ بولادى»، -دەپ كوركەم ءفيلمنىڭ ەلگە تيگىزەر ىقپالىن جوعارى باعالادى.                               ايتا كەتسەك، كوركەم اتاۋى   سىبايلاس جەمقورلىققا قارسى ءىس-قيمىل اگەنتتىگىنىڭ تاۋلىك بويى تەگىن قىزمەت ەتەتىن سەنىم تەلەفونى – 1424-كە نەگىزدەلىپ ارنايى قويىلعان. بۇل قوعام ومىرىندە سىبايلاس جەمقورلىق فاكتىلەرىنە تاپ بولعان ازاماتتاردىڭ جەدەل جەلىگە كەز-كەلگەن ۋاقىتتا حابارلاسىپ، قوعام ىندەتىمەن دەر كەزىندە قۇلاعدار ەتۋگە زور مۇمكىندىك بەرەدى.        شارا سوڭىندا ءو.شوكەيەۆ كينوتۋىندى دا بەلسەندىلىك تانىتقان ءبىرقاتار ازاماتتاردى العىس حاتپەن ماراپاتتاپ، شىعارماشىلىق جولدا شارىقتاي بەرۋلەرىنە تىلەكتەستىك ءبىلدىردى.                                                    

وبلىس اكىمىنىڭ وڭ باعاسىن العان اتالمىش فيلم وڭىردەگى سىبايلاس جەمقورلىق دەڭگەيىنىڭ تومەندەۋىنە، رۋحاني بولمىستىڭ كەمەلدەنۋىنە جانە مادەني شاھاردىڭ  ادالدىق مەكەنىنە اينالۋىنا تىڭ  سەرپىن بەرمەك.