بۇرىنعى مادەنيەت، اقپارات جانە سپورت ءمينيسترى، قازاقستاننىڭ گرۋزيا مەن بەلارۋستەگى ەكس-ەلشىسى، ۇزاق جىل نۇرسۇلتان نازاربايەۆتىڭ كومەكشىسى بولعان ەرمۇحامەت ەرتىسبايەۆ Business FM راديوسىنداعى "بايتاسوۆ LIVE" باعدارلاماسىندا قوناقتا بولىپ، زەينەت دەمالىسىنىڭ قالاي ءوتىپ جاتقانىن  ايتىپ بەردى.

ونىڭ سوزىنشە، زەينەتتىك دامىلىسقا شىققاننان كەيىن وعان ءارتۇرلى سالالارداعى قىزمەتتەن ۇسىنىستار كەلىپ تۇسكەن. الايدا ول ونىڭ بارىنەن باس تارتقان.

– ماعان "ەركىن ەكسپەرت" ستاتۋسىندا جۇمىس ىستەگەن ۇنايدى. مەن ءومىر بويى مەملەكەتتىك قىزمەتتە ىستەپ، جوعارى جالاقى الىپ كەلدىم. ءومىرىمنىڭ 7 جىلىن ارناعان ديپلوماتيالىق قىزمەتتە دە جالاقىم جوعارى بولدى. ءارى ونى قۇنسىزدانبايتىن ۆاليۋتادا بەرەتىن. سوندىقتان جۇمىس ىستەمەي-اق جاقسى ءومىر سۇرەرلىكتەي داۋلەتىم بار. ءقازىر مەن ەركىندىكتىڭ راحاتىن كورىپ جاتىرمىن. مەملەكەتتىك قىزمەتتى وڭاي دەيتىندەر قاتەلەسەدى. ول جەردەگى مىندەت پەن جاۋاپكەرشىلىكتىڭ جۇگى اۋىر. 63 جاسقا تولعاندا زەينەتكە كەتۋدى ۇيعاردىم. ايتپاقشى زەينەتاقىمدى راسىمدەپ تە ۇلگەردىم. ول مەندە ءتاپ-تاۋىر – 178 مىڭ تەڭگە، – دەيدى ول.

ەرتىسبايەۆ زەينەتاقىسىن راسىمدەۋ ءۇشىن ومىرىندە العاش رەت حالىققا قىزمەت كورسەتۋ ورتالىعىنا بارعان.