بۇگىن، 25 جەلتوقساندا بوستاندىق اۋدانىنىڭ تۇرعىندارىمەن كەزدەسكەن الماتى قالاسىنىڭ اكىمى باقىتجان ساعىنتايەۆ قالاداعى تيميرزيەۆ كوشەسىندەگى ۆRT جەلىسى قالا بەرەتىنىن، الداعى ۋاقىتتا LRT (جەڭىل تەمىرجول - رەد.) سالۋ ءۇشىن ۇكىمەتتەن قوماقتى قارجى سۇراعانىن ايتتى.
ساعىنتايەۆتىڭ ايتۋىنشا، تيميريازيەۆ كوشەسىندەگى BRT جەلىسىن ۇزارتۋ جوسپاردا بار، ال LRT قۇرىلىسى تۋرالى ماسەلە قاراستىرىلىپ جاتىر.
- بىزگە تيميريازيەۆ كوشەسىندەگى BRT تۋرالى كوپ ايتادى. مەن ءوز ۇستانىمىمدى ايتا كەتەيىن - BRT جەلىسى قالادى. جاقىن كۇندەرى ءبىز LRT قۇرىلىسى تۋرالى ماسەلەنى قاراستىرامىز. ءقازىر ۇكىمەتتەن قۇرىلىسقا قوماقتى قاراجات سۇراپ وتىرمىز. بۇل جوبانى مەملەكەتتىڭ قولداۋىمەن عانا جۇزەگە اسىرۋعا بولادى. سەبەبى مۇنداي ۇلكەن قۇرىلىسقا جەرگىلىكتى بيۋدجەتتىڭ شاماسى كەلمەيدى. تيميريازيەۆ كوشەسى بويىنداعى BRT جەلىسىن ۇزارتۋ جوسپاردا بار، - دەدى ساعىنتايەۆ.
الماتىداعى تيميريازيەۆ كوشەسىنىڭ جولى 2018 جىلدىڭ 1 قىركۇيەگىنەن باستاپ BRT جەلىسىنە اۋىستىرىلعان. بۇل - قازاقستانداعى BRT جەلىسىنىڭ العاشقىسى بولعان ەدى. ءدال وسى تيميريازيەۆ كوشەسىنىڭ BRT جەلىسىنە اۋىستىرىلعانىن قالا تۇرعىندارىنىڭ كوبىسى "جول قوزعالىسىن تەجەدى" دەپ قۇپتاماي، سول كەزدەگى الماتى اكىمى باۋىرجان بايبەكتى سىناعان.
ال LRT، ياعني، جەڭىل تەمىرجول الماتى قالاسىندا جوق. 2016 جىلى استانادا (قازىرگى نۇر-سۇلتان) قازاقستانداعى العاشقى LRT-نىڭ قۇرىلىسى باستالعان. باستاپقى جوسپار بويىنشا قۇرىلىس جۇمىستارى 2019 جىلى 31 جەلتوقساندا اياقتالىپ، 2020 جىلى جازدا پايدالانۋعا بەرىلۋى ءتيىس ەدى. 22 كيلومەتردەن اساتىن جولدى سالۋعا 1 ميلليارد 887 ميلليون دوللار بولىنگەن. ءبىراق كەيىن قۇرىلىس جۇمىستارى توقتاپ قالعان. 15 شىلدەدە قازاقستان پرەزيدەنتى قاسىم-جومارت توقايەۆ LRT قۇرىلىسى دۇرىس جوسپارلانباعانىن، جوبا تىم قىمباتقا جاسالعانىن سىناعان.
پىكىر قالدىرۋ