بۇگىن، 30 جەلتوقساندا ۇكىمەت وتىرىسىنان كەيىن ب ا ق وكىلدەرىنە سۇحباتىن بەرگەن قازاقستان پرەمەر-مينيسترىنىڭ ورىنباسارى رومان سكليار Bek Air اۋە كومپانياسىنىڭ حالىقارالىق ۇشۋلارعا سەرتيفيكات الۋ ءۇشىن مەملەكەتتىك ورگاندارعا قىسىم جاساۋعا تىرىسقانىن ايتتى. 

– Bek Air وسى جىلدار ىشىندە لوببيستەردىڭ قاتىسۋىمەن ءتۇرلى دەڭگەيدە حالىقارالىق اۋە رەيستەرىن ورىنداۋ ءۇشىن IOSA (Operational Safety Audit IATA - اۆياتاسىمالداۋشىلاردىڭ حالىقارالىق اسسوسياسياسىنىڭ قاۋىپسىزدىك جونىندەگى ءاۋديتى سەرتيفيكاتى – رەد.) سەرتيفيكاتىن الىپ تاستاۋعا تىرىستى. ءبىراق مۇنداي قىسىمعا قاراماستان مينيسترلىك وعان جول بەرمەدى، – دەدى سكليار.

سكلياردىڭ سوزىنشە، سول كەزدە حالىقارالىق تاسىمالدى جۇزەگە اسىراتىن بارلىق قازاقستاندىق كومپانيا IOSA سەرتيفيكاتىن العان.

– ىشكى تاسىمالعا دا ونىڭ (IOSA – رەد.)  تالاپتارى قاجەت بولاتىن. الايدا، وزدەرىڭىز دە بىلەسىزدەر، 2016 جىلى باق-تا ۇلكەن ناۋقان بولىپ، كەيبىر جۋرناليستەر مەن دەپۋتاتتار كومپانيانى (Bek Air – رەد.) قولداپ شىقتى. مۇمكىن ولاردىكى دە دۇرىس شىعار. ىشكى باعدارلاردىڭ قوسىمشا تالاپتارعا ساي بولۋى كەرەك تە ەمەس شىعار. سول كەزدە وكىلەتتى مەملەكەتتىك ورگان – يندۋستريا مينيسترلىگى ازاماتتىق اۆياسيا كوميتەتى «IOSA تالاپتارى ىشكى دە، سىرتقى دا تاسىمالعا قاجەت» دەلىنگەن قاۋلى شىعاردى. بۇل جەردە بەلگىلى ءبىر قايتا ساقتاندىرۋ ەلەمەنتتەرى، ياعني، قوسىمشا تالاپتار بار ەدى. دەگەنمەن، تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتى "بۇل – كاسىپكەرلەردىڭ قۇقىعىن بۇزۋ" دەگەن ۇيعارىم شىعارىپ، مينيسترلىك ىشكى رەيستەر ءۇشىن بۇل تالاپتى الىپ تاستاعان ەدى، – دەپ ءتۇسىندىردى رومان سكليار.

2016 جىلى قاڭتارىندا  Bek Air اۋە كومپانياسى مەن قازاقستاننىڭ ازاماتتىق اۆياسيا كوميتەتىنىڭ اراسىندا داۋ بولعان ەدى.  داۋ ازاماتتىق اۆياسيا كوميتەتىنىڭ Bek Air اۋە كومپانياسىنان IOSA سەرتيفيكاتىن الۋدى تالاپ ەتۋىنەن باستالعان. كوميتەت 2015 جىلدىڭ اياعىندا  "قاڭتاردىڭ 1-ىنەن باستاپ بارلىق كومپانيانىڭ سەرتيفيكاتى بولۋى ءتيىس" دەپ مالىمدەگەن. كەيىن Bek Air ۇندەۋ جاريالاپ، IOSA سەرتيفيكاتىن الۋعا 1 ميلليون 500 مىڭ دوللارداي قارجى كەتەتىنىن، ول بيلەت قۇنىنا اسەر ەتەتىنىن ايتىپ، وزدەرىن كەيىنگى جىلدارى بيلەت قۇنىن ارزانداتىپ، جولاۋشى سانىن كۇرت كوبەيتكەن كومپانيا دەپ سيپاتتاعان ەدى.

بۇعان قوسا، Bek Air "ۇشاقتارىمىزدىڭ ۇشۋ قاۋىپسىزدىگى كومپانيا ىسكە كىرىسكەلى، ياعني 2011 جىلدان بەرى 100 پايىزدان تومەندەمەگەن، كەرىسىنشە IOSA سەرتيفيكاتىن العان كومپانيالاردىڭ قاۋىپسىزدىك دەڭگەيى تومەندەۋ" دەپ مالىمدەگەن بولاتىن. سول كەزدە كومپانيانىڭ وسى ءۋاجىن ءبىرقاتار دەپۋتاتتار مەن قوعامدىق ۇيىمدار قولداعان. ولاردىڭ اراسىندا "اتامەكەن" ۇلتتىق كاسىپكەرلەر پالاتاسى بار ەدى. 

27 جەلتوقسان كۇنى تاڭەرتەڭ الماتى اۋەجايى ماڭىنا Bek Air اۋە كومپانياسىنىڭ Fokker-100 ۇشاعى قۇلادى. الماتى اۋەجايى باسپا ءسوز قىزمەتىنىڭ حابارلاۋىنشا، ۇشاقتا 93 جولاۋشى مەن بەس ەكيپاج مۇشەسى بولعان. رەسمي ورىنداردىڭ دەرەگىن نەگىزگە العان ءبىرقاتار ب ا ق باستاپقىدا 15 ادامنىڭ قازا تاپقانىن حابارلاعان ەدى. كەيىنىرەك پرەمەر-مينيستردىڭ ورىنباسارى رومان سكليار ۇشاق اپاتىنان 12 ادامنىڭ قازا بولعانىن مالىمدەدى. ولاردىڭ اراسىندا ەكيپاج كومانديرى مارات مۇراتوۆ تا بار. وسى اپاتقا بايلانىستى قازاقستان پرەزيدەنتى قاسىم-جومارت توقايەۆ  28 جەلتوقساندى جالپىۇلتتىق ازا تۇتۋ كۇنى دەپ جاريالاعان.