الماتىدا وتكەن باسپا ءسوز ءماسليحاتىندا Bek Air اۋەكومپانياسى ۇشۋ قىزمەتىنىڭ جەتەكشىسى ەريك ساپاروۆ Fokker 100 ۇشاعىنىڭ اپاتقا ۇشىراۋىنا "سەرىكتىك ءىز" ياعني اۋەگە كوتەرىلگەن ۇشاق سوڭىنان ىلەسەتىن قۇيىن سياقتى قۇبىلىس سەبەپ بولۋى مۇمكىن ەكەنىن ايتتى.

ونىڭ ايتۋىنشا، Fokker 100ء-دىڭ الدىندا اۋەگە جاڭا قوزعالتقىشتى، 89 توننالىق Airbus 321 لاينەرى اۋەگە كوتەرىلگەن. ۇشاق ۇلكەن، اۋىر بولعان سايىن "سەرىكتىك ءىز" دە سوعۇرلىم كۇشتى بولادى.

– Airbus 321-دىڭ ۇشۋ ۋاقىتى – 07:19. جىلدامدىعى – 180 ۋزەل (340 كم/ساع) بولعان. ال Fokker 100ء-دىڭ ۇشۋ ۋاقىتى – 07:20. جىلدامدىعى – 155 ۋزەل (287،1 كم/ساع). اراداسى 1 مينۋت. Fokker 100ء-دىڭ الدىندا ۇشىپ كەتكەن بورتتان قۋاتتى "سەرىكتىك ءىز" پايدا بولعان. ەكى ۇشاق اراسىنداعى ۋاقىتتىق ينتەرۆال كەمى 2 مينۋتتى قۇراۋى كەرەك. Fokker 100 اۋەگە كوتەرىلگەننەن 6 سەكۋند وتكەندە 19،6 فۋت (6 مەتر) بيىكتىكتە شايقالىپ، قيسايا باستاعان. ءار سەكۋند سايىن، بىرەسە وڭعا، بىرەسە سولعا قاراي. ۇشاقتىڭ بۇلايشا شايقالۋىنا نە سەبەپ؟ اۋا-رايى قالىپتى بولدى. بىزدىڭشە، وعان "سەرىكتىك ءىز" سەبەپ بولعان. ءبىزدىڭ نۇسقامىز وسىنداي، – دەيدى ەريك ساپاروۆ.

باسپا ءسوز جيىنىندا ۇشاق جولىندا كەزىككەن قۇرىلىس بولماسا قۇرباندار از بولۋى مۇمكىن ەدى دەگەن بولجام ايتىلىپ، اۋەجاي ماڭىندا تۇرعىزىلعان ءۇيدىڭ زاڭدىلىعىنا نازار اۋدارىلدى.