بۇل تۋرالى الماتى اۋەجايىندا وتكەن باسپا ءسوز ءماسليحاتىندا كومپانيا باسشىسى نۇرلان جۇماسۇلتانوۆ ايتتى دەپ حابارلايدى «Qamshy.kz» اقپارات اگەنتتىگى.

نۇرلان جۇماسۇلتانوۆ اۋەلى وقيعادان كەيىن كومپانيا ەسەڭگىرەپ قالعاندىقتان، ءۇنسىز بولعاندارىن جەتكىزدى.  بۇدان سوڭ ول ۇشاق اپاتىنان بۇرىنعى جاعدايلاردى ايتا كەلىپ:

«باعىتتان كىشكەنە اۋىتقۋدىڭ سالدارى قورشاۋ مەن عيماراتقا سوقتىعىسۋعا اكەلدى. بۇل قۇرىلىس ءقاۋىپتى وبەكتىنىڭ جانىندا قالاي بولۋى مۇمكىن دەگەن سۇراق تۋىندايدى. عيمارات قورشاۋعا جاقىن ورنالاسقان. پرەزيدەنت قۇرىلىستىڭ زاڭدىلىعىن انىقتاۋ ءۇشىن تاپسىرما بەردى. بۇرىندارى قاتاڭ شەكتەۋ بولاتىن. ەگەر وسى كەدەرگىلەر بولماعان جاعدايدا، مۇمكىن ادام شىعىنىنان قاشىپ قۇتىلۋعا بولار ەدى دەگەندى ويلاپ وتىرمىز. سونداي-اق ۇشاقتىڭ سەنىمدى ەكەنى كورىنىپ تۇر. جانارماي توگىلىپ قالعان جوق"،  – دەدى ول.

وسىلايشا، كومپانيا باسشىسى اۋە اپاتىنان كەيىن قازاقستاندىقتار سەنىمسىزدىك تانىتقان ۇشاقتىڭ سەنىمدى ەكەنىن «كورىپ» قويعان. ءارى اپاتقا ايتىلعان عيماراتتىڭ دا «كىنالى» بولعانىن ەسكە سالدى.

ايتا كەتەيىك، كەزدەسۋدى ق ر يندۋستريا جانە ينفراقۇرىلىمدى دامىتۋ مينيسترلىگى ۇيىمداستىردى.