ورتاق اڭگىمە بارىسىندا مەملەكەت باسشىلارى ەكى ەل اراسىنداعى جان-جاقتى ىنتىماقتاستىق پەن ستراتەگيالىق سەرىكتەستىكتىڭ قارقىندى دامىپ كەلە جاتقانىن ەرەكشە اتاپ وتكەن. سونداي-اق،قالىپتاسقان سەنىمدى بايلانىستار قازاقستان مەن رەسەيدىڭ ورتاق ىستە ودان ءارى جاقىنداي تۇسۋىنە ىقپال ەتەتىنى ءسوز بولدى.
«جاقىنداي ءتۇسۋ» دەمەكشى، قاسىم-جومارت توقايەۆ ۆلاديمير ءپۋتيندى كەلەسى جىلى ەلىمىزگە رەسمي ساپارمەن كەلۋگە شاقىردى.
بۇدان سوڭ مەملەكەت باسشىلارى ەكىجاقتى جانە كوپجاقتى فورماتتاعى بىرلەسكەن جۇمىستاردى جالعاستىرا بەرۋگە ۋاعدالاستى. سونىمەن قاتار، پرەزيدەنتتەر ءبىرىن-بىرى جاڭا جىلمەن قۇتتىقتاعان.
ەسكە سالا كەتەيىك، مەملەكەت باسشىسى بۇعان دەيىن بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو جانە وزبەكستان رەسپۋبليكاسىنىڭ پرەزيدەنتى شاۆكات ميرزيويەۆپەن تەلەفون ارقىلى سويلەسكەن بولاتىن. وسى بارىستا ول الەكساندر لۋكاشەنكومەن بەلارۋستىڭ 2020 جىلى ەۋرازيالىق ەكونوميكالىق وداق ۇيىمىنا ءتوراعالىق ەتۋىنە بايلانىستى ەۋرازيالىق ينتەگراسيا اياسىنداعى ءوزارا ءىس-قيمىلداردى ودان ءارى دامىتۋ جونىندە پىكىر الماسسا، شاۆكات ميرزيويەۆپەن اڭگىمە بارىسىندا وزبەكستانداعى قازاقستان جىلىنىڭ تابىستى وتكەنىنە ەرەكشە ءمان بەرگەن.
پىكىر قالدىرۋ