بەلگىلى قوعام قايراتكەرى سەرىكبولسىن ءابدىلدين قايتىس بولدى دەپ جازادى Qamshy.kz اقپارات اگەنتتىگى. بۇل تۋرالى اقپاراتتى Facebook الەۋمەتتىك جەلىسىندەگى پاراقشاسىندا تاۋەلسىز جۋرناليست ەرمۇرات باپي حابارلادى.

"قازاقستان دەموكراتيالىق قوزعالىسىنىڭ پايعامبارى سەرىكبولسىن اعا (ءابدىلدين) ومىردەن ءوتتى دەگەن سۋىق حابار كەلدى. بيلىككە يىلمەي وتكەن قايسار، قايتپاس ادام ەدى. قازاقستاننىڭ تاۋەلسىزدىگىن نازاربايەۆتان بۇرىن جاريا ەتىپ، "قازاقستاننىڭ تاۋەلسىزدىك دەكلاراسياسىنا" قول قويعان تاريحي تۇلعا ەدى... قوش بول، اسىل اعا!" دەپ جازدى باپي.

سەرىكبولسىن ءابدىلدين - قوعام قايراتكەرى، ەكونوميكا عىلىمدارىنىڭ دوكتورى، پروفەسسور.

ول 1937 جىلى شىعىس قازاقستان وبلىسى، قازىرگى تارباعاتاي اۋدانى قىزىلجۇلدىز اۋىلىندا تۋعان.  1982-1985 جىلدارى قازاق كسر اۋىل شارۋاشىلىعى ءمينيسترىنىڭ ءبىرىنشى ورىنباسارى، 1985 جىلى اوك-نى باسقارۋ جونىندەگى رەسپۋبليكالىق جوعارى مەكتەپتىڭ رەكتورى، 1986-1987 جىلدارى قازاقستان اۋىل شارۋاشىلىعى ءمينيسترى، 1990-1995 جىلى قازاق كسر جوعارى كەڭەسىنىڭ ءتوراعاسى بولىپ قىزمەت ەتكەن. 1995 جىلدان - قازاق مەملەكەتتىك اگرارلىق ۋنيۆەرسيتەتىنىڭ (قازىرگى - قازاق ۇلتتىق اگرارلىق ۋنيۆەرسيتەتى) اگروبيزنەس كافەدراسىنىڭ مەڭگەرۋشىسى، پروفەسسورى قىزمەتتەرىن اتقارادى.

سەرىكبولسىن ءابدىلدا ۇلى 11-گە جۋىق عىلىم ەڭبەك پەن 6 مونوگرافيانىڭ اۆتورى.

Qamshy.kz پورتالىنىڭ ۇجىمى سەرىكبولسىن ءابدىلديننىڭ وتباسى مەن تۋىستارىنا قايعىرا كوڭىل ايتادى.