الەۋمەتتىك جەلىدە "قىتايدا شىعۋ تەگى بەلگىسىز، ءقاۋىپتى ىندەت تارادى" دەگەن اقپارات قىزۋ تالقىلانىپ جاتىر. الايدا اتالمىش اقپارات رەسمي تۇردە راستالماعان. 

تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ رەسمي وكىلى ەرجان بايتانايەۆتىڭ حابارلاۋىنشا، جەلتوقسان ايىنىڭ سوڭىنان باستاپ حۋبەي پروۆينسياسىنىڭ ۋحان قالاسىندا (جۇڭگو) رەسمي تۇردە حالىقتىڭ ەتيولوگياسى انىقتالماعان پنيەۆمونيامەن اۋىرۋىنىڭ 44 جاعدايى تىركەلگەن.

بۇل تۋرالى Qamshy.kz اقپارات اگەنتتىگى tengrinews.kz سايتىنىڭ دەرەگىن نەگىزگە الىپ حابارلايدى.

"ينفەكسيا قوزدىرعىشى وسى ۋاقىتقا دەيىن انىقتالماعان. كوپتەگەن جاعداي قالالىق جاڭا تەڭىز ونىمدەرى بازارىمەن بايلانىستى، وندا قۇستىڭ ءار ءتۇرى، قويان، جىلان جانە باسقا دا باۋىرىمەن جورعالاۋشىلار ساتىلدى"، - دەپ ءتۇسىندىردى ول. 

"وسىعان بايلانىستى وسى ەلگە ساپاردى جوسپارلاۋ كەزىندە قىتايدا شىققان بەلگىسىز پنيەۆمونيامەن اۋىرۋ جاعدايلارى تۋرالى اقپاراتتى نازارعا الۋدى سۇرايمىز"، - دەپ تولىقتىردى ەرجان بايتانايەۆ. 

بۇگىندە نۇر-سۇلتان قالاسىنان بەيجىڭ، سانيا جانە ءۇرىمشى قالالارىنا، الماتىدان بەيجىڭ، سانيا، حايكوۋ، سيان جانە ءۇرىمشى قالالارىنا تىكەلەي اۋە رەيستەرى ءجۇرىپ جاتىر.

قحر-عا باراتىن تۇلعالارعا كوميتەتتە رەسپيراتورلىق ينفەكسيالاردىڭ الدىن الۋدىڭ نەگىزگى شارالارىن ساقتاۋدى ۇسىندى:

• ءجىتى رەسپيراتورلىق جۇقپالار بەلگىلەرى بار ادامدارمەن بايلانىسۋدان ساقتانۋ.
• ءجيى قولدى جۋۋ، اسىرەسە ناۋقاس ادامدارمەن نەمەسە ولاردىڭ ورتاسىمەن تىكەلەي بايلانىسقاننان كەيىن 
• فەرمالارداعى جانۋارلارمەن نەمەسە جابايى جانۋارلارمەن جاناسۋدان اۋلاق بولۋ.
• جەدەل رەسپيراتورلىق ينفەكسيا سيمپتومدارى پايدا بولعان كەزدە مەديسينالىق كومەككە جۇگىنىڭىز.