بۇگىن، 6 قاڭتاردا شىعىس قازاقستان وبلىسى زايسان قالاسىندا باستالعان جۇڭگو قازاقتارى قاستەر مۇساحان ۇلى مەن مۇراگەر ءالىم ۇلىنىڭ سوتى كەيىنگە قالدىرىلدى. سوت باستالىپ، كۋالەردەن جاۋاپ الىنا باستاعاندا ءىستى جۇرگىزگەن سۋديا شىنار وسپانوۆا كەلەسى وتىرىس 21 قاڭتار كۇنى وتەتىنىن ايتىپ، سوتتى توقتاتتى.
سوتقا جينالعان بەلسەندىلەر سوت وتىرىسىنىڭ كەيىنگە قالدىرىلۋىنا نارازىلىق ءبىلدىرىپ، سۋديا وسپانوۆاعا شاعىم ايتتى. ال ەكى جىگىتتىڭ ادۆوكاتى ءلاززات احاتوۆا سۋديانىڭ سوت وتىرىسىن كەيىنگە قالدىرۋىن "سوتقا جينالعان ازاماتتارعا قۇرمەتسىزدىك" دەپ، جوعارى سوتقا شاعىم تۇسىرەتىنىن ايتتى.
بەلسەندىلەر سۋديا شەشىمىنە نارازىلىق ءبىلدىرىپ، بيلىكتى سىناي باستاعاندا، پروكۋراتۋرا وكىلدەرى ازاماتتارعا بۇل جينالىپ تۇرعاندارى "زاڭسىز" ەكەنىن ايتىپ، "تاراڭىزدار" دەگەن ەسكەرتۋ جاسادى.
وتكەن جىلى قازان ايىندا جۇڭگو قازاقتارى قاستەر مۇساحان ۇلى مەن مۇراگەر ءالىم ۇلىنىڭ قىتاي-قازاقستان شەكاراسىن كەسىپ ءوتىپ، الماتىعا كەلگەن. الماتىداعى ادام قۇقىعىن قورعاۋ بيۋروسىندا وتكەن باسپا ءسوز ءماسليحاتىندا قاستەر مۇساحان ۇلى شىڭجاڭداعى "ساياسي لاگەردە قاماۋدا بولعانىن"، مۇراگەر ءالىم ۇلى قىتايدا "قىسىم كورگەنى" ءۇشىن شەكارانى كەسىپ وتكەنىن ايتتى. ال قازاقستان ۇلتتىق قاۋىپسىزدىك كوميتەتى (ۇقك) مۇساحان ۇلى مەن ءالىمۇلىن "شەكارادان زاڭسىز ءوتتى" دەپ ايىپتاپ، وسكەمەن قالاسىنداعى تەرگەۋ يزولياتورىنا جەتكىزگەن.
قازاقستان بيلىگىنەن بوسقىن مارتەبەسىن سۇراعان قىتايدىڭ ەكى ازاماتىنا قازان ايىنىڭ سوڭىندا "پانا ىزدەۋشى تۇلعا" كۋالىگى بەرىلگەن ەدى.
پىكىر قالدىرۋ