قازاقستاننىڭ يندۋستريا جانە ينفراقۇرىلىمدىق دامۋ مينيسترلىگى ەل ازاماتتارىنا Bek Air اۋە كومپانياسىنىڭ ۇشاقتارىنا بيلەت الماۋعا كەڭەس بەردى. بۇل تۋرالى مينيسترلىك ءوزىنىڭ تەلەگرام پاراقشاسى ارقىلى حابارلادى.
"Bek Air اۋە كومپانياسىنىڭ ەكسپلۋاتانت سەرتيفيكاتىنىڭ بەلگىسىز مەرزىمگە توقتاتىلۋىنا بايلانىستى، ازاماتتارعا اتالعان اۋە كومپانيانىڭ رەيستەرىنە بيلەتتەر ساتىپ الماۋعا كەڭەس بەرىلەدى" - دەلىنگەن ۆدەموستۆو تاراتقان حابارلامادا.
الماتى اۋەجايى ماڭىنا قۇلاعان «Bek Air» ۇشاعىنا قاتىستى مالىمەتتەردى مىنا جەردەن بىلۋگە بولادى.
2019 جىلدىڭ 27 جەلتوقسان كۇنى تاڭەرتەڭ الماتى اۋەجايى ماڭىنا Bek Air اۋە كومپانياسىنىڭ Fokker-100 ۇشاعى قۇلادى. الماتى اۋەجايى باسپا ءسوز قىزمەتىنىڭ حابارلاۋىنشا، ۇشاقتا 93 جولاۋشى مەن بەس ەكيپاج مۇشەسى بولعان. رەسمي ورىنداردىڭ دەرەگىن نەگىزگە العان ءبىرقاتار ب ا ق باستاپقىدا 15 ادامنىڭ قازا تاپقانىن حابارلاعان ەدى. كەيىنىرەك پرەمەر-مينيستردىڭ ورىنباسارى رومان سكليار ۇشاق اپاتىنان 12 ادامنىڭ قازا بولعانىن مالىمدەدى. ولاردىڭ اراسىندا ەكيپاج كومانديرى مارات مۇراتوۆ تا بار. وسى اپاتقا بايلانىستى قازاقستان پرەزيدەنتى قاسىم-جومارت توقايەۆ 28 جەلتوقساندى جالپىۇلتتىق ازا تۇتۋ كۇنى دەپ جاريالاعان ەدى.
پىكىر قالدىرۋ