الماتىدا 888،4 مىڭ تۇرعىن مىندەتتى الەۋمەتتىك مەديسينالىق ساقتاندىرۋ پاكەتىنە كىرەتىن قىزمەتتەردى تەگىن پايدالانا الادى. بۇل تۋرالى مەديسينالىق ساقتاندىرۋ ماسەلەلەرى جونىنىدەگى رەسپۋبليكالىق شتاب وتىرىسىندا «الەۋمەتتىك مەديسينالىق ساقتاندىرۋ قورى» كەاق الماتى فيليالى ديرەكتورى نۇرلىبەك قابدىقاپاروۆ حابارلادى.
«بيىلدان باستاپ جەڭىلدىگى بار 15 ساناتقا جاتاتىن تۇرعىندارعا ساقتاندىرۋ پاكەتىندەگى قىزمەتتەردى مەملەكەت ەسەبىنەن كورسەتىلەدى. قازىرگى تاڭدا شامامەن الماتى تۇرعىندارىنىڭ 44،7 پروسەنتى اتالعان ساناتقا كىرەدى»، – دەدى ن.قابدىقاپاروۆ.
فيليال باسشىسى الماتىلىقتاردى مەديسينالىق ساقتاندىرۋ جۇيەسىمەن تولىققاندى قامتۋ، بارلىق مەديسينا ۇيىمدارداعى اقپاراتتىق جۇيەلەردى ىقپالداستىرۋ، ءاربىر تۇرعىننىڭ مارتەبەسىن انىقتاۋ ماسەلەلەرىنىڭ ماڭىزىن اتاپ ءوتتى. ايتۋىنشا، 2018 جىلدىڭ 1 قاڭتارىندا قالا بويىنشا مارتەبەسى انىقتالماعان 246 مىڭ ادام بولعان. وتكەن جىلدىڭ سوڭىندا 197 مىڭ ادامنىڭ ساقتاندىرۋ جۇيەسىندەگى مارتەبەسى انىقتالدى.
2020 جىلعا بەلگىلەنگەن جوسپار بويىنشا، 159،2 ملرد تەڭگەنىڭ قىزمەتى ساتىپ الىنباق. ونىڭ 103،5 ملرد تەڭگەسى – تەگىن كومەك پاكەتىنە، 55،7 ملرد تەڭگەسى – ءمامس پاكەتىنە تيەسىلى.
سونىمەن قاتار، بيىلعى جىلى كت/مرت سىندى باعاسى قىمبات بولىپ كەلەتىن قىزمەتتەرگە 3،8 ملرد تەڭگەدەن استام، ونكولوگيالىق سىرقاتتاردى ەمدەۋگە 49 ملن تەڭگەدەن استام قارجى قاراستىرىلعان. جالپى قالا بويىنشا 12 كت، 13 مرت اپپاراتى بار، دەدى ن.قابدىقاپاروۆ.
دەنساۋلىق ساقتاۋ ۆيسە-مينيسترى ءلاززات اقتايەۆا الماتى قالاسىنىڭ مامس-كە دايىندىق دەڭگەيى جوعارى ەكەنىن اتاپ ءوتتى.
«بۇگىنگى تاڭدا مەديسينا مەكەمەلەرىندەگى جۇمىس ورىندارى كومپيۋتەرمەن تولىق قامتاماسىز ەتىلگەن. مەملەكەتتىك ەمحانالار مەن اۋرۋحانالار اقپاراتتىق جۇيەلەرگە قوسىلعان. سونداي-اق، ءمامس شەڭبەرىندە قالپىنا كەلتىرۋ، وڭالتۋ، كونسۋلتاتيۆتىك-دياگنوستيكالىق كومەك پەن ستاسيوناردى الماستىراتىن كومەككە بولىنەتىن قاراجات تا ەداۋىر ارتىپ وتىر»، – دەدى ۆيسە-مينيستر.
الدىن الا بەرىلگەن مالىمەتكە سۇيەنسەك، 2020 جىلى حالىققا 269 مەديسينا ۇيىمى قىزمەت كورسەتەدى. ونىڭ 131ء-ى – تەگىن مەديسينالىق كومەك پاكەتى، 138ء-ى – ساقتاندىرۋ پاكەتى بويىنشا جۇمىس ىستەيدى. قورمەن كەلىسىمشارت بەكىتكەن كلينيكالاردىڭ باسىم بولىگى – جەكەمەنشىك.
پىكىر قالدىرۋ