قىتايدا پايدا بولعان قۇپيا ۆيرۋستى جۇقتىرعانداردىڭ سانى رەسمي دەرەكتەرگە قاراعاندا الدەقايدا كوپ، دەپ جازادى bbc.

بۇگىندە كوروناۆيرۋسقا شالدىعۋدىڭ 60 جاعدايى انىقتالعان. الايدا بريتاندىق عالىمداردىڭ پىكىرىنشە، ۆيرۋستى جۇقتىرعاندار سانى 1700-گە جۋىقتاعان.

وتكەن جىلدىڭ جەلتوقسان ايىندا قىتايدىڭ ۋحان قالاسىندا ەكى ادام تىنىس الۋ اۋرۋلارىنىڭ سالدارىنان قايتىس بولعان.

عالىم، اۋرۋ وشاقتارىن زەرتتەۋشى پروفەسسور نيل فەرگيۋسون "ءبىر اپتا بۇرىنعىعا قاراعاندا ايتارلىقتاي الاڭداۋلى" ەكەنىن جاسىرمايدى. ول مۇنداي قورىتىندىعا ۇلىبريتانيا ۇكىمەتى مەن دۇنيەجۇزىلىك دەنساۋلىق ساقتاۋ ۇيىمدارىنا كەڭەس بەرەتىن لوندون يمپەراتورلىق كوللەدجىندەگى MRC جۇقپالى اۋرۋلاردى جاھاندىق تالداۋ ورتالىعى جۇرگىزگەن زەرتتەۋ ناتيجەسى بويىنشا كەلگەن.

بۇگىندە سينگاپۋر مەن گونكونگ قالالارىنداعى اۋەجاي قىزمەتكەرلەرى قىتايدىڭ ۋحان قالاسىنان كەلگەن جولاۋشىلاردى تەكسەرىپ جاتىر. اقش بيلىگى دە جۇما كۇنى سان-فرانسيسكو، لوس-اندجەلەس جانە نيۋ-يوركتەگى ءۇش ءىرى اۋەجايدى تەكسەرگەن.

دەسە دە پروفەسسور فەرگيۋسون "دابىل قاعۋعا ءالى ەرتە" دەپ وتىر.

ال قىتايلىق شەنەۋلىكتەر ۆيرۋستىڭ ءبىر ادامنان ەكىنشىسىنە جۇعۋى جاعدايىنىڭ بولماعانىن، ۆيرۋستىڭ ۋحان قالاسىنداعى تەڭىز ونىمدەرى مەن جابايى تابيعات بازارىندا جانۋارلاردان شىققانىن العا تارتادى. 

دۇنيەجۇزىلىك دەنساۋلىق ساقتاۋ ۇيىمىنىڭ قىتايلىق بيۋروسىنىڭ حابارلاۋىنشا، جاڭا كورونوۆيرۋس جايىندا ءالى دە كوپتەگەن زەرتتەۋلەر جۇرگىزۋ قاجەت. ءقازىر ونىڭ قالاي جۇعاتىنى، كلينيكالىق بەلگىلەرى، قانشالىقتى تارالعانى بەلگىسىز بولعاندىقتان، ناقتى ءبىر تۇجىرىم ايتۋ قيىن.

ناۋقاستاردان الىنعان ۆيرۋستىق سىنامالارعا جۇرگىزىلگەن زەرتحانالىق تالداۋلارعا قاراپ، جۇڭگو مەن دۇنيەجۇزىلىك دەنساۋلىق ساقتاۋ ۇيىمىنىڭ رەسمي وكىلدەرى ينفەكسيا – "كوروناۆيرۋس" دەگەن قورىتىندىعا كەلگەن.

كوروناۆيرۋستار – بۇل ۆيرۋستاردىڭ كەڭ توبى. ولاردىڭ تەك التىسى عانا ادامدارعا جۇعادى. ال قازىرگى ۆيرۋس ونىڭ جەتىنشىسى ەكەنى انىقتالدى.

ۆيرۋستىڭ جەڭىل ءتۇرى تۇماۋ رەتىندە بىلىنسە، اۋىر فورماسى كوروناۆيرۋسقا ۇلاساتىن رەسپيراتورلىق سيندرومعا اينالادى.

2002 جىلى قىتايدا ىندەتتىڭ اۋىر فورماسىنا شالدىققان 8 098 ادامنىڭ 774ء-ى كوز جۇمعان.