ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ ارمەنيا مەن قىرعىزستاننان اكەلىنگەن ءرولى وڭ جاقتاعى جانە ەسكىرىپ قالعان كولىكتەردەن قالاي قۇتىلۋعا بولاتىنىن ايتىپ بەردى، دەپ جازادى Qamshy.kz اقپارات اگەنتتىگى. بۇل تۋرالى ول ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا مالىمدەدى.

قوجايەۆتىڭ سوزىنشە، ونداي كولىكتەردەن قۇتىلۋدىڭ بىرنەشە جولى بار.  

– قازىرگى تاڭدا زاڭمەن بەكىتىلگەن تەحنيكالىق رەگلامەنتتەردى اينالىپ وتەتىن امال جوق. بۇل - ءرولى وڭ جاقتاعى كولىكتەرگە قاتىستى ماسەلە. بۇل ەرەجە كەرەك دەسەڭىز، 2008 جىلى قابىلدانىپ قويعان. ونى قازاقستان ازاماتتارىنىڭ ءبارى بىلەدى. ال ەندى نە ىستەۋ كەرەك دەگەنگە كەلسەك، جوق دەگەندە شىعىننىڭ ءبىر بولىگىن ءوندىرىپ الۋدىڭ ءارتۇرلى جولى بار. ونداي كولىكتەرگە تەحنيكالىق رەگلامەنت رۇقسات بەرەتىن ەلدەرگە وتكىزۋگە بولادى. اۆتوكولىكتى قوسالقى بولشەك تۇرىندە ساتۋعا دا جول اشىق. كولىك اكەلىنگەن ەلگە قايتا اپارىپ، ونىڭ ساپاسى مەن كەدەندىك تولەمدەرى تۋرالى جالعان اقپارات بەرگەن ادامعا قارسى سوت شاعىمىن تۇسىرۋگە بولادى. بۇل جەردە جاعداي ءار ءتۇرلى. ءار جاعدايدى جەكە تالداپ، ادامدارعا سوعان سايكەس ارەكەت الگوريتمىن ۇسىنىپ جاتىرمىز، – دەدى  قوجايەۆ. 

قاڭتار ايىنىڭ ورتاسىندا ىشكى ىستەر مينيسترلىگى قازاقستان اۋماعىندا جۇرگەنىنە ءبىر جىل بولعان، ءبىراق ەسەپكە تۇرماعان شەتەلدەن اكەلىنگەن كولىك يەلەرىنە ەسكەرتۋ جاساپ، زاڭدى تىركەۋگە قويۋعا شاقىرعان. وسىدان كەيىن اقتاۋ، اقتوبە، جاڭاوزەن، ورال، سەمەي، پەتروپاۆل، قىزىلوردا  قالالارىندا تىركەلمەگەن كولىك يەلەرى جينالىپ، نارازىلىققا شىققان. ولار قازاقستانعا اكەلگەن كولىكتى تىركەۋ تىم قىمبات ەكەنىن ايتادى. بيلىك تىركەلمەگەن كولىكتەر زاڭ بۇزسا، جاۋاپكەرشىلىكتەن جالتارادى دەپ ەسەپتەيدى.