مەملەكەت باسشىسى قاسىم-جومارت توقايەۆ قازاقستاننىڭ زاڭناماسىنا ساي كەلمەيتىن شەتەلدىك كولىكتەردى ەلگە كىرگىزبەۋدى تاپسىردى، دەپ حابارلايدى قازاقپارات.

– ءبىزدىڭ ازاماتتار رەسەي مەن قىرعىزستاننان سەنىمحات ارقىلى كولىكتەردى ساتىپ الا بەرەدى. كەيىن سول كولىكتەرىن ءبىزدىڭ ەلدە تىركەمەي، ايداپ جۇرەدى. ءوز ازاماتتارىمىز قازاقستاننىڭ زاڭناماسىن بۇزا وتىرىپ، تەحنيكالىق قۇجاتتاردى رەسىمدەيدى. ەلگە كىرگىزىلىپ جاتقان ونداي كولىكتەردىڭ كوبى ەسەپكە تىركەلمەيدى. ولاردىڭ سانى ون مىڭداعان ساننان اسىپ كەتەدى. وسى سەبەپتى، باس پروكۋراتۋراعا قالىپتاسقان جاعدايعا قۇقىقتىق باعا بەرۋدى تاپسىرامىن، – دەدى پرەزيدەنت ۇكىمەتتىڭ كەڭەيتىلگەن وتىرىسىندا.

مەملەكەت باسشىسى ۇكىمەتكە ءبىر ايدىڭ ىشىندە قازاقستان ازاماتتارىنىڭ ەاەو ەلدەرىنەن 2020 جىلدىڭ 1 اقپانىنا دەيىن اكەلگەن كولىكتەرىن تىركەتۋدى تاپسىردى.

– بۇل كولىكتەردىڭ تىركەلۋى 2021 جىلدىڭ 1 ناۋرىزىنا دەيىن كۇشىندە بولادى. مۇنداي كولىكتەر تەحنيكالىق رەگلامەنتتىڭ تالاپتارىنا ساي بولۋى كەرەك. سونداي-اق، تىركەۋ سوماسى مەن مەملەكەتتىك باجدى تولەۋى ءتيىس. ۋاقىتشا تىركەۋ ءبىر قولدان ەكىنشى قولعا ساتىلىپ بارىپ، جاسالماۋى ءتيىس. 2021 جىلدىڭ 1 ناۋرىزىنا دەيىن اۆتوكولىك يەلەرى كولىكتەرىن تۇراقتى تارتىپتە تىركەپ، كەدەندىك باج بەن ۋتيليزاسيالىق سومانى تولەۋى ءتيىس. بولماسا ول كولىكتى ەلدەن شىعارۋى نەمەسە زاڭنامامەن تىيىم سالىنبايتىن باسقا دا امالمەن ماسەلەسىن رەتتەۋى قاجەت. ۇكىمەتكە قازاقستاننىڭ زاڭناماسىنا قايشى كەلەتىن كولىكتەردى بۇدان ارى كىرگىزبەۋدى جانە پايدالانۋعا شەكتەۋ قويۋ شارالارىن قولعا الۋدى تاپسىرامىن»، – دەدى مەملەكەت باسشىسى.

پرەزيدەنت بۇل جەردە وتاندىق مۇددە باستى نازارعا الىنۋى كەرەكتىگىن تاپسىردى.