قازاقستاندىق پروكۋرورلار باقىتجان ساعىنتايەۆتڭ جوبالارىنا كۇدىكپەن قاراي باستادى. ەركىن ەكونوميكالىق ايماققا ينۆەستورلار ورنىنا ريەۆيزورلار كەلگەن.  بۇل تۋرالى «ratel.kz» ءجۋرناليستى ءجاميلا ماريچيەۆا جازادى.

پاۆلودارلىق پروكۋروتۋرا «پاۆلودار» ەركىن ەكونوميكالىق اۋماعىنا تەكسەرىس جۇرگىزگەن. ال اتالمىش ەكونوميكالىق زونا قازىرگى ۆيسە-پرەمەر ءمينيسترى باقىتجان ساعىنتايەۆتىڭ 2011 جىلى وبلىس اكىمى بولىپ تۇرعان كەزىندەگى باستاماسىمەن اشىلعان بولاتىن.

ودان بەرى حيمپاركتىڭ ينفراسترۋكتۋراسىن وركەندەتۋگە مەملەكەت قازىناناسىنان ميللاردتاعان قارجى بولىنگەنىمەن ناتيجە جوقتىڭ قاسى. بۇل تۋرالى قازاقستاندىق ب ا ق از جازباعان.

مىسالى، اتالمىش حيمپاركتىڭ اينالاسىن قورشاۋعا بيۋدجەتتەن  230 ميلليون تەڭگە جۇمسالعان. الايدا ەشقانداي ينۆەستور حيمپارككە قىزىعۋشىلىق تانىتپاعان.

سونداي-اق، اتالمىش اۋماقتا سۋ قۇبىرلارىن جوندەۋ ءۇشىن تاعى 700 ميلليون تەڭگە جۇمسالىپتى. دەسە دە، زاۋىت ءالى ءوز جۇمىسىن تولىق باستاماعان. ال جاڭا جوندەلگەن سۋ قۇبىرلارى قايتا جوندەۋدى تالاپ ەتىپ تۇر دەيدى اۆتور.

ايتپاقشى، زاۋىتتىڭ قورشاۋلارى مەن سۋ قۇبىرلارىنان وزگە كەدەندىك باقىلاۋ قۇرىلعىلارى ورناتىلعان. ال مۇنىڭ سوماسى – 450 ميلليون تەڭگەگە جۋىقتالعان جانە قازىرگى تاڭدا زاۋىت اۋماعىندا 3،7 ميلليارد تەڭگەگە باعالانعان تاعى ءبىر قۇرىلىس جۇرگىزىلىپ جاتىر.

نۇرزات توعجان