قازاقستاننىڭ بۇرىنعى پرەزيدەنتى، قاىپسىزدىك كەڭەسىنىڭ ءتوراعاسى نۇرسۇلتان نازاربايەۆ جوعارى سوت كەڭەسىنىڭ ءتوراعاسى تالعات دوناقوۆتى قابىلدادى. بۇل تۋرالى Elbasy.kz سايتى حابارلادى. 

سايتتىڭ جازۋىنشا، كەزدەسۋ بارىسىندا نازاربايەۆقا ەلدەگى سوت جۇيەسىن رەفورمالاۋ جانە ۇلت جوسپارىنداعى سوت كادرلارىن ىرىكتەۋ جانە دايىنداۋ بويىنشا شارالاردى جۇزەگە اسىرۋ جونىندە اقپاراتتار ايتىلدى. ال نازاربايەۆ دوناقوۆقا سۋديالار ءبىلىمدى، ادال بولۋى كەرەك ەكەنىن ايتتى. 

– جوعارى سوت كەڭەسى سوت ماماندارىن ىرىكتەۋدى ىسكە اسىرادى. بۇل جۇمىس وبەكتيۆتى بولۋى كەرەك. سۋديالار ناقتى كونكۋرسقا سايكەس ىرىكتەۋدەن وتۋگە ءتيىس. ولار ءبىلىمدى، ادال بولۋى، ادامدارمەن جۇمىس ىستەي ءبىلۋى قاجەت، – دەدى بۇرىنعى پرەزيدەنت.

ال دوناقوۆ نازاربايەۆقا سۋديالاردى ىرىكتەۋدە اشىقتىقتى قامتاماسىز ەتۋ ءۇشىن قابىلدانعان شارالار تۋرالى ايتىپ بەردى.

– جاعداي وزگەرىپ جاتىر. سۋديالارعا دەگەن سەنىم ارتىپ كەلەدى. جۇمىس بارىنشا وبەكتيۆتى جانە اشىق جۇرگىزىلۋدە. ارنايى كونكۋرستىق كوميسسيا قۇرىلدى. وعان سۋديالارمەن بىرگە زاڭ قاۋىمداستىعى وكىلدەرى، HR-ماماندار، تاۋەلسىز ساراپشىلار كىردى. قازىرگى تاڭدا سوتتارعا باراتىن كادرلاردىڭ دايىندىعى جوعارى، جاۋاپكەرشىلى مول، – دەدى جوعارى سوت كەڭەسىنىڭ ءتوراعاسى.