قازاقستان سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشيەۆ پەن ەلدىڭ ىشىكى ىستەر ءمينيسترى ەرلان تۇرعىمبايەۆ  ازاتتىقراديوسىنىڭ ءجۋرناليسى وركەن جويامەرگەننىڭ ايسۇلتان نازاربايەۆ تۋرالى قويعان سۇراعىنا جاۋاپ بەرگەن جوق. جۋرناليست "قازاقستان ازاماتى ايسۇلتان نازاربايەۆ وزىنە ءقاۋىپ ءتونىپ تۇرعانىن ايتتى..." دەپ سۇراعىن قويا باستاعاندا  نۇرىشيەۆ "بۇل سۇراقتىڭ ماعان قاتىسى جوق" دەپ سۇراققا جاۋاپ بەرۋدەن باس تارتسا، تۇرعىمبايەۆ "حابارىم جوق" دەپ قىسقا قايىردى. 

قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ جيەن نەمەرەسى، قازاقستان پارلامەنتى سەناتىنىڭ قازىرگى سپيكەرى داريعا نازاربايەۆانىڭ  ۇلى ايسۇلتان نازاربايەۆ وتكەن سارسەنبىدە "ماعان ءقاۋىپ ءتونىپ تۇر" دەپ مالىمدەگەن.  قازاقستاندىق جۋرناليستەرگە بەرگەن سۇحباتىندا ايسۇلتان نازاربايەۆ وزىنە ءقاۋىپ اناسىنان ءتونىپ تۇرعانىن، نۇرسۇلتان نازاربايەۆ اتاسى ەمەس، بيولوگيالىق اكەسى ەكەنىن ايتقان ەدى. كەيىننەن قازاقستان ۇلتتىق قاۋىپسىزدىك كوميتەتىنىڭ ەكس-توراعاسى، سىرتتاي 10 جىلعا سوتتالىپ ءقازىر ۆەنادا تۇرىپ جاتقان ءالنۇر مۇسايەۆ ايسۇلتان نازاربايەۆتىڭ دنك ساراپتاماسىن جاريالاعان بولاتىن. مۇسايەۆ جەلىگە جاريالاعان قۇجاتتا ايسۇلتاننىڭ اكەسى داريعا نازاربايەۆنىڭ بۇرىنعى كۇيەۋى راحات الييەۆ ەكەنى كورسەتىلگەن. ال نازاربايەۆتار وتباسى بۇل جايتقا قاتىستى ەشقانداي رەسمي اقپارات بەرگەن جوق. 

وتكەن جىلى قازاننىڭ 18ء-ى كۇنى لوندون سوتى ايسۇلتان نازاربايەۆقا ءبىر جىل شارتتى جازا كەستى. بريتانيالىق باق-تاردىڭ جازۋىنشا، ول 2019 جىلى ماۋسىم ايىندا بريتان پوليسياسىنا قارسىلىق كورسەتكەنى ءۇشىن جاۋاپقا تارتىلعان. نازاربايەۆتار وتباسى ايسۇلتاننىڭ ۇلىبريتانيادا ۇستالعانى جانە سوتتالعانى جايلى ەشقانداي مالىمدەمە جاساعان جوق.

1990 جىلى 26 تامىزدا ومىرگە كەلگەن ايسۇلتان نازاربايەۆ – قازاقستاندى 30 جىلعا جۋىق ۇزدىكسىز بيلەپ، 2019 جىلى ناۋرىزدا ءوز ەركىمەن پرەزيدەنتتىك قىزمەتتەن كەتكەن (ءبىراق ەلدەگى بيلىكتىڭ ءبىر تارماعىن ۇستاپ وتىرعان)  نۇرسۇلتان نازاربايەۆتىڭ ۇلكەن قىزى داريعا نازاربايەۆا مەن اۆستريا تۇرمەلەرىنىڭ بىرىندە كوز جۇمعان قازاقستاندىق شەنەۋنىك راحات الييەۆتىڭ ۇلى.

قازاقستاندىق اقپارات قۇرالدارىنىڭ جازۋىنشا، ايسۇلتان نازاربايەۆ بالا كەزدەن فۋتبولعا قىزىققان. 2006 جىلى قازاقستاننىڭ جاسوسپىرىمدەر قۇراماسىنىڭ ساپىندا ەۋروپا چەمپيوناتىنىڭ ىرىكتەۋ تۋرنيرىنە قاتىسقان. "چەلسي" جانە "پورتسمۋت" جاستار كوماندالارى مەن قازاقستاندىق "استانا" كومانداسىندا ويناعان.

ول ۇلىبريتانيا كورولدىگىنىڭ "ساندحەرست" اسكەري اكادەمياسىن ءتامامداعان. ايسۇلتان وقۋىن ءبىتىرىپ، قازاقستانعا ورالعان سوڭ ەلدىڭ قورعانىس مينيسترلىگىنىڭ بارلاۋ باسقارماسىندا قىزمەت ەتتى. 2017 جىلى 7 ايداي قازاقستان فۋتبول فەدەراسياسىنىڭ ۆيسە-پرەزيدەنتى قىزمەتىن اتقاردى. 

ايسۇلتان نازاربايەۆ 2013 جىلى "قازرومگاز" اق باسشىسى، الماتىلىق "قايرات" فۋتبول كلۋبىنىڭ قوجايىنى قايرات بورانبايەۆتىڭ قىزى اليما بورانبايەۆعا ۇيلەندى. 2016 جىلدىڭ جازىندا ولاردىڭ امەلي ەسىمدى قىزى دۇنيەگە كەلدى.