بۇگىن الماتىداعى ءال-فارابي قازاق ۇلتتىق ۋنيۆەرسيتەتىندە ءابۋ ناسىر ءال-فارابيدىڭ 1150 جىلدىق مەرەيتويىنا وراي "ۇلى دالانىڭ ۇلى  ەسىمى" اتتى سالتاناتتى ءىس-شارا ءوتتى. شاراعا كەلگەن قوناقتار شىعىس ويشىلدارى، قازاقستان تۇڭعىش پرەزيدەنتى، اباي جانە الاش قوزعالىسى قايراتكەرلەرىنە ارنالعان مۇراجاي ەكسپوزيسيالارىمەن تانىستى.

سالتاناتتى شارادا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەربايەۆ ءسوز سويلەدى.

– الەمدىك دەڭگەيدە ۇلى تۇلعالارىمىزبەن ءارقاشاندا ماقتانامىز. بيىل ۇلى تۇلعالاردان ءال-فارابيدىڭ 1150 جىلدىعى، ۇلى ابايدىڭ 175 جىلدىق مەرەيتويلارىن ەل بولىپ اتاپ وتۋدەمىز. بۇل ءبىزدىڭ حالقىمىزدىڭ رۋحاني بىرىگۋىنە سەپتىگىن تيگىزەدى. مەملەكەت باسشىسى قاسىم-جومارت توقايەۆ: "اباي جانە ءححى عاسىرداعى قازاقستان" ماقالاسىن كەلتىرە وتىرىپ: "ءبىز ۇلتتىق سانانى جاڭعىرتامىز جانە باسەكەگە قابىلەتتى ۇلت قالىپتاستىرامىز دەسەك، ۇلى تۇلعالاردىڭ جاڭعىرۋلارىن مۇقيات وقۋىمىز كەرەك" دەپ اتاپ ءوتتى. ولاردىڭ قوعامداعى ءتۇرلى ۇدەرىستەرگە قاتىستى كوزقاراسى بۇگىنگى قازاقستان ءۇشىن اسا پايدالى. وزدەرىڭىزگە بەلگىلى وتكەن اپتادا ەلوردامىز نۇر-سۇلتان قالاسىندا ۇلى ابايدىڭ 175 جىلدىعىنا ارنالعان ءىس-شارا جوعارى دەڭگەيدە ءوتتى، – دەدى مەملەكەتتىك حاتشى.

شاراعا سماعۇل ەلۋباي، نۇرلان ورازالين، سەيفوللا وسپان، عالىم جايلىباي، ءاسانالى ءاشىموۆ، ورازبايەۆ يرانبەك، مەرۋەرت وتەكەشوۆا، نۇرعالي ءنۇسىپجانوۆ، اقۇشتاپ باقتىگەرەيەۆا، ەسكەندىر حاسانعالييەۆ، ءجۇرسىن ەرمان، قابدەش ءجۇمادىلوۆ، زارەما قاستەيەۆا سىندى قوعام جانە ونەر قايراتكەرلەرى، سونداي-اق قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ، مادەنيەت جانە سپورت ءمينيسترى اقتوتى رايىمقۇلوۆا  قاتىستى.

ءابۋ ناسىر ءال-فارابيدىڭ 1150 جىلدىق مەرەيتويىنا ورايلاستىرىلعان شارا ستۋدەنتتەر سارايىندا وتكەن مەرەيتويلىق كونسەرتپەن ۇلاستى.

سالتاناتتى جيىندا ءسوز العان الماتى قالاسىنىڭ اكىمى باقىتجان ساعىنتايەۆ اتاۋلى كۇندەرگە ارنالعان مەرەكەلىك شارالارىنىڭ الماتى قالاسىندا باستالۋىنىڭ دا وزىندىك سىرى بار ەكەنىن ايتتى.

– سەبەبى، ەلىمىزدەگى ەڭ باستى وقۋ ورداسى – ءال-فارابي اتىنداعى قازاق ۇلتتىق ۋنيۆەرسيتەتى مەن فارابي مۇرالارىن جۇيەلى زەرتتەيتىن ىرگەلى عىلىمي ورتالىق – ۇلتتىق اكادەميا دا الماتى قالاسىندا قونىس تەپكەن. وعان ءال-فارابي كىتاپحاناسى مەن فارابي ورتالىعىن قوسىڭىز. وسى ورايدا، سىزدەرگە سۇيىكتى قالامىزعا قوش كەلدىڭىزدەر دەي وتىرىپ، بۇگىنگى ايتۋلى شارا – ءال-فارابيدىڭ 1150 جىلدىق مەرەيتويىنىڭ رەسمي اشىلۋىمەن بارشاڭىزدى قۇتتىقتايمىن!

ءال-فارابي ايتىپ كەتكەن ىزگى ارمانداردى جۇزەگە اسىرۋ، سول مەجەگە ۇمتىلۋ – دۇنيەجۇزىندەگى بارلىق قاۋىمداردىڭ تۇپكى ماقساتى. وسى ورايدا، الماتى قالاسىنىڭ دامۋىنا قاتىستى بەكىتىلگەن باعدارلاماعا سىزدەردىڭ دە نازارلارىڭىزدى اۋدارعىم كەلەدى، دەگەن قالا اكىمى الماتى قالاسى ءوزىنىڭ دامۋ جولىن 7 ستراتەگيالىق باعىتتا جۇرگىزۋدى كوزدەپ وتىرعانىن اتاپ ءوتتى.

– ءبىزدىڭ پايىمىمىز بويىنشا بولاشاق الماتى بۇل:

1) شەتى جوق قالا؛

2) «اقىلدى قالا؛

3) تەڭ مۇمكىندىكتەر قالاسى؛

4) ءقاۋىپسىز قالا؛

5) جاسىل قالا؛

6) جاھاندىق ىسكەرلىك ورتالىق؛

7) مادەني كرەاتيۆتى قالا.

بايقاساڭىزدار، ءبىزدىڭ ۇستانىپ وتىرعان بۇل ماقساتتار ءال-فارابي مۇرات ەتكەن «قايىرىمدى قالا» تۇرعىزۋ قادامدارىمەن ۇشتاسىپ جاتىر، – دەدى باقىتجان ساعىنتايەۆ.