بۇعان دەيىن ءبىلىم بەرۋدى دامىتۋ تۋرالى ەكى باعدارلاما دا ورىندالمادى. ساۋاتسىزدىقتىڭ بەلەڭ الۋى مەن جالپى ءبىلىم ساپاسىنىڭ تومەندەۋىن توقتاتاتىن داعدارىسقا قارسى شارالار دەرەۋ ازىرلەنۋى قاجەت. بۇل تۋرالى ماجىلىستەگى حالىق كوممۋنيستەرى فراكسياسىنىڭ مۇشەلەرى ۇكىمەت باسشىسىنا دەپۋتاتتىق ساۋال جولداۋ بارىسىندا ءمالىم ەتتى، دەپ جازدى zakon.kz.

– سوڭعى رەيتينگتىڭ كورسەتكىشتەرىنە نازار اۋدارساق، ءبىلىم سالاسى ايتارلىقتاي تومەن ناتيجە كورسەتۋدە. ماتەماتيكا بويىنشا قازاقستان 78 ەلدىڭ ىشىندە 54-ورىندا، جاراتىلىستانۋ جانە وقۋ ساۋاتتىلىعىنان 69-ورىندا. اقپاراتتىق، كومپيۋتەرلىك (ICILS) جانە ەرەسەكتەردىڭ ساۋاتتىلىعى (PIAAC) بويىنشا ەڭ تومەنگى دەڭگەيدەمىز، – دەدى دەپۋتات ايقىن قوڭىروۆ.

ونىڭ سوزىنشە، قازاقستاندا ادام كاپيتالى دامۋدىڭ ورنىنا كەرى كەتىپ جاتىر.
– اۋىلدىق جەرلەردە دە، وندىرىستە دە جاس مامانداردى دايارلاۋ دەڭگەيىنىڭ تومەندەۋى – ەڭ وتكىر پروبلەما. ادام كاپيتالىنىڭ ەكونوميكانىڭ تۇراقتىلىعىنا قوساتىن ۇلەسى ورازان زور. قازاقستان 2019 جىلى جاھاندىق يننوۆاسيالار يندەكسىندە 79-ورىنعا يە بولدى. 2018 جىلمەن سالىستىرعاندا 5 پوزيسيادان ايىرىلعان، – دەدى قوڭىروۆ.

كوممۋنيستەردىڭ پىكىرىنشە، وسى ارقىلى مەملەكەتتىڭ ءوزى دارىندى جاستاردىڭ شەتەلگە كەتۋىن ىنتالاندىرىپ وتىر.

كوپتەگەن اتا-انالار ءبىلىم بەرۋ جۇيەسىنىڭ دەگراداسيا دارەجەسىن ءتۇسىنىپ، بالالارىن قازاقستاننان تىس مەملەكەتتەرگە جىبەرەدى.

– ءبىز ءوزىمىزدى ويلايمىز دەپ ەل بولاشاعىنا الاڭدامايمىز، ۇرپاعىمىز ءۇشىن باستى قۇندىلىق – ءبىلىم بەرۋ مادەنيەتىن جويۋعا مۇمكىندىك بەرەمىز، – دەپ اتاپ ءوتتى دەپۋتات.