بۇگىن «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ القا وتىرىسىنا قاتىسىپ، وندا «Nur Otan» پارتياسىنىڭ قوعامداعى سىبايلاس جەمقورلىققا نولدىك توزبەۋشىلىك قاعيداتتارىن ىسكە اسىرۋداعى ءرولى» تاقىرىبىندا بايانداما جاسادى. ءوز سوزىندە باۋىرجان بايبەك بيىلعى ناۋرىزدا ەلباسىنىڭ قاتىسۋىمەن پارتيا ساياسي كەڭەسىنىڭ كەڭەيتىلگەن وتىرىسى وتكىزىلەتىنىن ايتتى.

پارتيا ءتوراعاسى ءبىرىنشى ورىنباسارىنىڭ سوزىنە قاراعاندا، ساياسي كەڭەستە قارالاتىن ماسەلەلەردىڭ ءبىرى رەتىندە پارتيانىڭ سىبايلاس جەمقورلىققا قارسى ءىس-قيمىل جانە پارتياىشىلىك ءتارتىپتى ساقتاۋ بويىنشا جۇمىسى ءسوز بولماق. سونداي-اق سىبايلاس جەمقورلىققا قارسى ءىس-قيمىل جونىندەگى پارتيالىق باعدارلامانىڭ ءبىرىنشى كەزەڭىن جۇزەگە اسىرۋ قورىتىندىسى شىعارىلادى.  

– قازاقستان رەسپۋبليكاسىنىڭ تۇڭعىش پرەزيدەنتى – ەلباسى، پارتيا ءتوراعاسى نۇرسۇلتان ءابىش ۇلى نازاربايەۆ اتاپ وتكەندەي، قازاقستان 2050 دامۋ ستراتەگياسىنىڭ ماقساتتارىنا مەملەكەت پەن قوعامنىڭ جەمقورلىققا قارسى بىرلەسكەن كۇرەسى ارقىلى قول جەتكىزۋگە بولادى.

سىبايلاس جەمقورلىق – ەلىمىزدىڭ بارلىق جەتىستىكتەرىنە سەبەپ بولعان تاۋەلسىزدىگىمىزگە نۇقسان كەلتىرەتىن باستى فاكتورلاردىڭ ءبىرى.

مەملەكەت باسشىسى قاسىم-جومارت كەمەل ۇلى توقايەۆ سىبايلاس جەمقورلىققا قارسى جۇيەلى كۇرەستى ءوزىنىڭ سايلاۋالدى باعدارلاماسىنىڭ باستى باعىتى رەتىندە ايقىندادى.

سوندىقتان سىبايلاس جەمقورلىققا قارسى ءىس-قيمىل «Nur Otan» پارتياسى ءۇشىن باسىمدى باعىتتاردىڭ ءبىرى بولىپ تابىلادى – دەدى باۋىرجان بايبەك.

بيىل پارتيانىڭ سىبايلاس جەمقورلىققا قارسى ءىس-قيمىل باعدارلاماسىنىڭ 2025 جىلعا دەيىنگى ەكىنشى كەزەڭىن ىسكە اسىرۋ باستالادى.

پارتيا مۇددەلى مەملەكەتتىك ورگاندارمەن بىرلەسىپ، قوعامدىق باقىلاۋدى كۇشەيتۋ، جەرگىلىكتى ءوزىن-وزى باسقارۋ ورگاندارىنىڭ وكىلەتتىلىگىن كەڭەيتۋ، كۆازيمەملەكەتتىك سەكتوردا سىبايلاس جەمقورلىق قۇقىق بۇزۋشىلىقتار سۋبەكتىلەرىنىڭ شەڭبەرىن كەڭەيتۋ جانە مەملەكەتتىك قىزمەتشىلەردىڭ شىعارماشىلىق، سونىمەن بىرگە باسقا دا اقىلى جۇمىستى ىسكە اسىرۋ ءتارتىبى بويىنشا زاڭ جوبالارىن ازىرلەۋدى كوزدەيتىن ەكىنشى كەزەڭنىڭ جول كارتاسىن جاساعان.

سونداي-اق، جول كارتاسىندا سىبايلاس جەمقورلىققا قارسى حالىقارالىق رەيتينگتەردە، سونىڭ ىشىندە «Transparency International» سىبايلاس جەمقورلىقتى ءتۇيسىنۋ يندەكسىندە، دۇنيەجۇزىلىك ەكونوميكالىق فورۋمنىڭ جاھاندىق باسەكەگە قابىلەتتىلىك يندەكسى رەيتينگىندە قازاقستاننىڭ پوزيسياسىن جاقسارتۋ بويىنشا ءىس-شارالار قاراستىرىلعان.