5 اقپاندا نۇر-سۇلتان قالاسىنداعى ءدامحانالاردىڭ بىرىندە كوپ بالالى انالار بىلتىر ورتتەن قازا بولعان بەس سابيگە ارناپ، اس بەردى. وعان جۇزگە جۋىق ادام جينالدى. اراسىندا اكىمدىك وكىلدەرى دە بولدى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ.
انالاردىڭ ايتۋىنشا، يمام شاقىرىپ، قۇران وقىتۋعا قاجەتتى شىعىندى وزدەرى كوتەرگەن. اركىم جاعدايىنا قاراي 500،1000، 2000 مىڭ تەڭگەدەن قوسىلعان.
وتكەن جىلى 4 اقپانعا قاراعان ءتۇنى استانا ماڭىنداعى كوكتال-1 ىقشاماۋدانىندا كومىرمەن جىلىناتىن جەر ۇيدەن ءورت شىعىپ، ءبىر وتباسىنىڭ بەس قىزى قازا بولعان. قايعىلى وقيعا قازاقستاندىقتاردىڭ مەملەكەتتىك الەۋمەتتىك ساياساتقا قاتىستى اشۋ-ىزاسىن تۋعىزدى.
نۇر-سۇلتان مەن وڭىرلەردەگى كوپبالالى انالار الەۋمەتتىك قولداۋدىڭ جەتكىلىكسىزدىگىن ايتىپ، نارازىلىققا شىقتى. كەيىنىرەك ۇكىمەت كوپ بالالى وتباسىلارعا بەرىلەتىن الەۋمەتتىك كومەك تۇرلەرىن كوبەيتكەن.
ەل استاناسىندا بولعان قايعىلى وقيعادان كەيىن تۋرا ءبىر جىلدان سوڭ، ۇقساس جاعداي الماتى تۇبىندەگى اۋىلدا قايتالاندى. اقپاننىڭ 3ء-ى كۇنى وستەمىر اۋىلىندا بولعان ورتتەن ءۇش جانە ءتورت جاستاعى ەكى بالا قازا تاپتى. اتا-اناسى بۇل كەزدە ۇيدە بولماعان: اكەسى قالاعا جۇمىس ىزدەۋگە، ال اناسى ۇلى مەن قىزىن سىرتىنان جاۋىپ، دۇكەنگە كەتكەن.
پىكىر قالدىرۋ