قازىرگى تاڭدا قىتايدا 780-گە جۋىق قازاقستاندىق تۇرادى، ولاردىڭ ىشىندە ەلگە قايتۋعا ءوتىنىش بىلدىرگەن ازاماتتار سانى وتە كوپ. بۇل تۋرالى Primeminster سايتى حابارلايدى. 

پرەمەر-مينيستردىڭ ورىنباسارى بەردىبەك ساپاربايەۆ ەلدە كوروناۆيرۋستىڭ پايدا بولۋى مەن تارالۋىن بولدىرماۋ ماقساتىندا ۆەدومستۆوارالىق كوميسسيانىڭ كەزەكتى وتىرىسىن وتكىزدى.

دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنشا، قازىرگى ۋاقىتتا قازاقستاندا كوروناۆيرۋس ينفەكسياسى تىركەلگەن جوق. قىتايمەن مەملەكەتتىك شەكارا ارقىلى وتەتىن بارلىق وتكىزۋ پۋنكتتەرىندە سانيتارلىق-ەپيدەميولوگيالىق باقىلاۋ جالعاسۋدا، 6 قاڭتاردان باستاپ 21،8 مىڭ ادام قارالدى.سونىمەن قاتار، 5 اقپاندا دەنە قىزۋى كوتەرىلگەن 104 ادام اۋرۋحاناعا جەتكىزىلدى، ولاردىڭ 71ء-ى بوساتىلدى، 33 ادام اۋرۋحانالاردا قالدى، بارلىعى تەكسەرىستەن ءوتتى.

ۋحاننان 1 كۇن بۇرىن ەۆاكۋاسيالانعان 83 قازاقستاندىق كارانتيندە. زەرتحانالىق زەرتتەۋلەردىڭ ناتيجەسى بويىنشا، كەلگەن ادامداردا كوروناۆيرۋستىق ينفەكسيانىڭ بولماعانى انىقتالدى. 

"قازىرگى ۋاقىتتا قىتايدا 780 قازاقستان ازاماتى بار، ولاردىڭ 559-ى ستۋدەنتتەر. 427 ادام قازاقستانعا جەتكىزۋدى سۇرادى، ال قالعاندارى قىتايدا قالۋعا نيەت ءبىلدىردى"، - دەدى سىرتقى ىستەر ءمينيسترىنىڭ ءبىرىنشى ورىنباسارى شاحرات نۋرىشيەۆ. 

بەردىبەك ساپاربايەۆ كوروناۆيرۋستىڭ پايدا بولۋى مەن تارالۋىن بولدىرماۋعا ارنالعان ءبىرقاتار ناقتى مىندەتتەرگە توقتالىپ، بارلىق قىزمەتتەردىڭ جۇمىسىن قارقىندى رەجيمدە جالعاستىرۋ قاجەتتىگىن اتاپ ءوتتى.