قىتايدا ءومىر بويىنا سوتتالعان اقجارقىن تۇرلىباي قازاقستانعا قايتارىلسا، راقىمشىلىققا ىلىگۋى مۇمكىن. باس پروكۋروردىڭ ورىنباسارى مارات احمەتجانوۆ وسىلاي دەدى، دەپ حابارلايدى 24.kz.

احمەتجانوۆتىڭ ايتۋىنشا، ءقازىر ايىپتالۋشى جۇڭگو سوتىنىڭ ۇكىمىمەن كەلىسپەي، اپپەلياسيالىق شاعىم تۇسىرگەن.

وسى پروسەسس اياقتالعان سوڭ باس پروكۋراتۋرا وكىلدەرى ونى ەلگە قايتارىپ الۋ ماسەلەسىمەن اينالىسادى. ءقازىر قازاقستان مەن جۇڭگو اراسىندا سوتتالعانداردى ەكستراديسيالاۋ تۋرالى كەلىسىم بار. سونىڭ نەگىزىندە اقجارقىن تۇرلىبايدى ەلگە الدىرۋعا مۇمكىن بولادى. ەگەر ەلگە قايتىپ، راقىمشىلىق ناۋقانى وتكىزىلسە، ءىستى بولعان قازاق قىزىنا كەشىرىلىم بەرىلۋى ابدەن مۇمكىن.

قازاقستاندىق تاراپ ءقازىر جۇڭگو سوتىنىڭ شەشىمى زاڭدىق كۇشىنە ەنگەنىن كۇتىپ وتىر.

ءبىز رەسمي تۇردە جۇڭگو مەملەكەتىنە ونداي ارىز-شاعىم ءتۇسىپ جاتقان كەزدە ەگەر ول كىسىلەر جازاسىن قازاقستاندا وتەيمىز دەسە، سۇراۋ جىبەرەمىز. ءبىزدىڭ شارتتار بويىنشا ەگەر قازاقستاندا راقىمشىلىق بولسا، ءاربىر كەلىسىمدە ءار ءتۇرلى جازىلعان (قانداي مەملەكەتپەن قالاي كەلىسەمىز)، ونداي مۇمكىندىكتەر تولىق بار، – دەدى مارات احمەتجانوۆ، ق ر باس پروكۋرورىنىڭ ورىنباسارى.