جامبىل وبلىسىنىڭ ماسانشى اۋىلىنداعى وقيعا كەزىندە الەۋمەتتىك جەلىنىڭ كەي قولدانۋشىلارى زاڭسىز ارەكەتتەردى جاساۋعا شاقىرعان، دەپ ايتتى ىشكى ىستەر ءمينيسترى ەرلان تۇرعىمبايەۆ وقك-دەگى بريفينگ بارىسىندا. 

– 7 اقپاندا كەشكى 19:00-دە قورداي اۋدانى ماسانشى اۋىلىنىڭ شەتىندە 70-كە جۋىق نارازى تۇرعىن جينالدى، ولاردىڭ اراسىندا بۇزاقىلىق نيەتپەن توپتىق ۇرىس باستالدى. وقيعا ورنىنا قوردايلىق ىشكى ىستەر ءبولىمىنىڭ قىزمەتكەرلەرى كەلدى. ارانداتۋشىلار مەن وقيعا كۋاگەرلەرى بولعان جايتتى ۆيدەوعا ءتۇسىرىپ، مەسسەندجەرلەر مەن الەۋمەتتىك جەلى ارقىلى تۇرعىنداردى زاڭسىز ارەكەتتەرگە شاقىرعان. بۇل قاقتىعىستىڭ شيەلەنىسۋىنە جانە توپتىق ۇرىسقا قاتىسۋشىلار سانىنىڭ كوبەيۋىنە اكەلدى. ناتيجەسىندە كورشى ەلدى مەكەندەردەن 300-گە جۋىق ادام كەلدى، – دەپ مالىمدەدى تۇرعىمبايەۆ.

ءمينيستردىڭ ايتۋىنشا، ماسانشى اۋىلىندا قوعامدىق ءتارتىپتى قامتاماسىز ەتۋ ءۇشىن قوسىمشا پوليسيا جاساقتارى جىبەرىلگەن.

– جانجالعا قاتىسۋشىلار پوليسياعا بەلسەندى قارسىلىق كورسەتىپ، ولاردىڭ زاڭدى تالاپتارىن دورەكى تۇردە ورىنداماعان. بۇزاقىلار مەتالل زاتتاردى، تاستاردى، اتىس قارۋلارىن قولدانعان. كەيىنىرەك اۋقاتتى جانە بۇلان-باتىر اۋىلدارى دا قاقتىعىستارعا ۇشىرادى. ەلدى مەكەندەر مەن جولدارعا كىرەتىن پەريمەتردىڭ اينالاسىنداعى جولداردا بوگەتتەر قويىلدى، – دەدى ول.