تۋعان جەرىم جامبىل وبلىسى، قوردايعا قاراستى "ماسانشى" اۋىلىندا بولعان دۇربەلەڭ كەشەدەن بەرى تىنىشىمىزدى الىپ، تىنىسىمىزدى تارىلتىپ وتىر. جان-جاقتان ءتۇرلى ۆيدەولار كەلىپ، جانىمىزدى قۋىرعانداي، قانىمىزدى قوزدىرعانداي اسەر ەتىپ بولدى. قازاقپىز عوي، "قازاقتىڭ اقساقالىن ساباپتى" دەگەندە نامىسىمىز ويناپ شىعا كەلگەنى راس. "ءتۇننىڭ كەسىرى بار" دەمەي مە قازاق، بۇل لاپ ەتپە اشۋ تۇندەگى ۆيدەولاردىڭ اسەرى ەكەنىن تاڭ اعاراڭ بەرە بايىپپەن ۇعىپ وتىرمىن. قازىرگى مالىمەتكە سۇيەنسەم، ادام شىعىنى بار ەكەن. ۇلتارالىق قاقتىعىسقا دا ۇقسايدى. ءبىز ءوزى وتىز جىلدان بەرمەن ايالاپ كەلگەن تاۋەلسىزدىگىمىزدىڭ ءبىر ۇستىنى دا وسى قازاق پەن وزگە دياسپورالاردىڭ تاتۋلىعى ەدى عوي. دەمەك، بۇل ءبىزدىڭ جاندى جەرىمىز. دۇنگەن بولا ما، باسقا بولا ما، ولار وسى ەلدىڭ يەسى قازاق ەكەنىن ۇمىتپاعاندارى ابزال. ال ءبىز - قازاق، وسى ۇلى دالانىڭ مۇراگەرى رەتىندە اينالامىزدا توپتاسقان ۇساق ۇلتتاردان شىققان كەي تەنتەكتى تەزگە سالۋدا شەكتەن شىقپاساق ەكەن دەيمىن. قىزدى-قىزدىمەن قيراتپايىق، كۇشەيگەن بولىپ كۇيرەتىپ المايىق دەيمىن. اسىرەسە اقپارات تاراتقاندا اباي بولايىق. وسى جەردە ايتا كەتەيىن، "بۇلارمەن قوسا باسقالارعا دا كوكەسىن كورسەتۋ كەرەك" دەگەندەردىڭ كەۋ-كەۋىنە كەلىسپەيمىن. ءبىز ەلمىز، مەملەكەتپىز. زاڭىمىز بار. بۇل زاڭعا قايشى. سوسىن "جامان ۇلت بولمايدى، جامان ادام بولۋى مۇمكىن" دەمەي مە. ەندەشە، ءناسىلى مۇسىلمان دۇنگەن ۇلتىنىڭ ىشىندەگى ىزگىلەرى دە ارانداپ، تاسقىن اشۋدىڭ كوشكىنىندە قالماسا ەكەن. ءبىز قازاق ءوزى ەشكىمگە سوقتىقپاي جاي جاتقان ەلمىز عوي اۋەلدەن. تيگەندى تىيىپ قالۋ، سوقتىققاندى سويىپ سالۋدان كەندە ەمەسپىز. ال باستى قاسيەتىمىزدىڭ ءبىرى - كەز كەلگەن جاعدايدا بايىپپەن سارالاپ بارىپ، ساقتىقپەن ءىس قىلۋ. ەل ءبىر، وتان جالعىز. يەسى قازاق. جەرىمىزدىڭ تۇتاستىعى مەن قاۋىپسىزدىگى اۋەلى قازاقتىڭ قامى.
وسى تۇستا مەملەكەتتىك كۇشتىك قۇرىلىمدار دا كىنالىنى تاۋىپ، لايىقتى جازاسىن بەرەدى دەپ سەنەمىن. پرەزيدەنتىمىز قاسىم-جومارت كەمەل ۇلى دا ماسەلەنى لايىقتى تۇردە شەشۋ ءۇشىن سيتۋاسيانى دەرەۋ قولعا الدى. كوميسسيا قۇرىلدى. ءار ءسوزىمىز بەن ىسىمىزگە ەسەپ بەرە قادام باسۋىمىز كەرەك. اۋەلى ارانداپ قالمايىق، سوسىن سان سوعىپ وتىرمايىق.
ال بۇل قايعىلى جاعداي ەندى قايتالانباسىن، قازاقتىڭ دا، باسقا ۇلتتاردىڭ دا قانى توگىلمەسىن دەپ اللادان رياسىز پەيىلمەن سۇرايمىن.
تىلەگىم - تاتۋلىق، باتام - بىرلىك.