قورداي وڭىرىندە كەشە بولعان قاقتىعىس تۋرالى بەلگىلى زاڭگەر ايگۇل ورىنبەك ءوز ويىن ورتاعا سالدى. "ءسوز باسىن الىستان وراعىتپاي، ۋشىققان جاعدايدى ناقتىلاي كەلە: ناتيجە كورسەتەتىن  زاڭ بار، دەگەنمەن سول زاڭدى ىسكە اسىرۋشىلار ءوز ىستەرىنە ءۇستىرت قارايدى" دەپ باستاعان زاڭگەر Facebook پاراقشاسىندا ەڭ الدىمەن بولعان جايتقا كىنالىلەردى تىزبەكتەپ ايتىپ بەردى.

"1. بۇل جانجالعا ەڭ باستى كىنالى ادامدار پوليسيا قىزمەتكەرلەرى. وزدەرىن قورعاۋعا شامالارى جەتپەسە، حالىق ولارعا قالاي سەنىم ارتادى. ەڭ سوراقىسى، الەۋمەتتىك جەلىلەردە تاياق جەپ جاتقان قۇزىرەتتى ورگان قىزمەتكەرلەرىنىڭ ۆيدەو-سۋرەتتەرى كەڭىنەن تارالۋدا.

2. اقپارات تاراتۋدان تىم شەتتە قالىپ كەلەمىز. اقپارات ءمينيسترى ابايەۆ ساعات 16:00 ورىن العان وقيعانى ابدەن سوزىپ، تۇنگى  ساعات 12-دە ارەڭ بەردى. ابايەۆتىڭ كوپ كۇتتىرگەن سوزىنەن دە ىلە-شالا جامبىل وبلىسىنىڭ باسپا ءسوز قىزمەتى ارقىلى ءايتىپ-بۇيتىپ جاتىپ قۇلاعدار بولدىق! فورۋم وتكىزىپ اقپاراتتىڭ ءتۇرلى جولدارىن ايتقاندا بالە دەيمىز. ال ىسكە كەلگەندە كوزگە كورىنەرلىك ناتيجە جوق! 200 ميلليونعا رەسەيدىڭ بلوگەر، جۋرناليستەرىن شاقىرىپ ساباق ۇيرەنىپ جۇرگەن ابايەۆ بۇل جولى دا ەشتەڭە ۇيرەنبەگەنىنىڭ كورىنىسى.

3. بۇل وقيعا بۇكىل اكىمدەرگە مەن پوليسيا قىزمەتكەرلەرىنە ساباق بولۋ كەرەك! حالىق تاراپىنان تۇسكەن ەشقانداي ارىز قارالىپ جاتقانى شامالى. سونىڭ كەسىرىنەن وزگە ۇلتتاردىڭ اراسىندا دۇربەلەڭ باستالادى. فيرداۋسي اۋىلىن دا تىلگە تيەك ەتسەك بولادى. اسىقپاساق، ءار ءىستىڭ سوڭى وسىنداي تۇيىتكىلدى پروبلەمالارعا ۇلاسا بەرەتىن بولادى.

4. ۇلتتىڭ جامانى بولمايدى. تەك ىشىنەن سونداي بىرەۋلەرى شىعادى. قانشا جەردەن اشۋ قىسىپ، ىشىمىزگە سىيماي بارا جاتسا دا، ءبىز قاتىگەز ەمەسپىز. وزگەنىڭ دارەجەسىنە ءتۇسىپ، ەتكەن ىسىنە جاۋىزدىق، قاتىگەزدىكپەن جاۋاپ قايتارۋ ءبىزدىڭ تەكتىلىگىمىزگە نۇقسان كەتىرەدى" دەلىنگەن زاڭگەر جازباسىندا.